Нийслэлийн хэмжээнд 1960 оноос хойш барьсан угсармал 1077 орон сууц бий. Эдгээр барилга нь өвөл хүйтэн, сантехникийн шугам нь хуучирсан, борооны ус дээвэр, цонхоор нь гоождог, хана туурга, таазаараа дулаан алдагдал ихтэй байдаг.
Тиймээс “Дулаан техникийн шинэчлэлтийн үйл ажиллагааны журам”-ын дагуу дулаалгын ажлыг эхлүүлснээр угсармал орон сууцуудыг зөвхөн гадна талаас дулаалаад орхих биш дээвэр, сантехник гээд цогцоор нь шинэчлэдэг. Одоогоор Баянгол дүүргийн 1 дүгээр хорооны 9 байр, Хан-Уул дүүргийн 3 дугаар хорооны 31-дүгээр байр, Сонгинохайрхан дүүргийн 18 хорооны 10 дугаар байранд зураг, төсөв боловсруулах, их засвар хийх ажлыг эхлүүлжээ.
Иргэд энд хамрагдахын тулд байрныхаа СӨХ-ны хурлаар хэлэлцүүлж, саналаа дүүргийн ЗДТГ-т хүргүүлэх бөгөөд дүүргээс төсөлд хамрагдах хүсэлтийг зөвшөөрч, батламжлан Улаанбаатар хотын Захирагчийн ажлын албанд хүргүүлнэ. Улаанбаатар хотын Захирагчийн ажлын алба нь дулаан алдагдлын зэрэглэл тогтоож, тухайн объектод тохирсон дулаан техникийн шинэчлэлийн ажлын даалгавар, техникийн тодорхойлолтыг боловсруулж, сууц өмчлөгч болон гүйцэтгэгч компанитай гурван талт гэрээ байгуулснаар төсөл хэрэгждэг байна.
А.САЯН
