Нэг дор "Хамгийн олон нугараач зэрэг уран нугарсан" хэмээн Гиннесийн номонд тодоор бичигдэх үйл явдлын гэрч нь Монгол Улсын иргэд боллоо хэмээн тоглолтыг зохион байгуулагчид нь онцолж байв.
Тоглолт 1 цаг 30 минут үргэлжилсэн бөгөөд Дарь эхүүд, ус, цэцэгс, могойн чуулган, Алунгоо хатан гэсэн тус бүрийн уран нугаралтын үзүүлбэр тоглолтын хэсгүүдээс бүрджээ. Тоглолтод Үндэсний циркийн дэргэдэх Уран нугаралтын дугуйлан, Шинэ цирк төвийн дэргэдэх “Отгоо” студи, Нугаралтын “X-Roses” студи, Хаан банкны дэргэдэх “Акработын төв", Циркийн хөгжил төвийн нугараачид, Улаанбаатар чуулгын нугараачид, Дархан хотын “Шонхоодой” цирк, Эрдэнэтээс ““Эрдэнэс”, “Увидас” дугуйлан, Дундговь аймгаас “Сондор”, Дорноговь аймгаас “Дорнын уянга” гээд нийт уран нугаралтын 20 студийн 427 уран нугараач, жүжигчид оролцож уран нугаралтаа хийж сонирхуулсан. Тэдний хамгийн бага нь 4 настай А.ЭРХСУВД охин байлаа.
Тоглолтын ерөнхий найруулагчаар МУСТА Р.Мөнхсайхан ажиллаж, Улаанбаатар чуулгын уран бүтээлчид оролцож уран бүтээлээсээ нийслэлчүүддээ толилууллаа.
Ц.БАТТУЯА
