Ийм нэгэн үг байдгийг манай төр засгийнхан, "нууц, чухал" хэмээх өндөр албан тушаалд заларсан эрхмүүд санадаг баймаар. Улсад нууц гэж байх ёстой. Намын дээр улсын эрх ашиг гэж байх ёстойг сануулах ч шаардлагагүй. Намын томилгоогоор очсон эрхмүүд намынхаа эрх ашиг, хувийнхаа арьсыг хамгаалахыг хичээж эхэллээ. Монгол банк хэмээх, Монголын мөнгөний бодлогыг баригч байгууллагын ерөнхийлөгч Н.Баяртсайхан нь, ам.долларын ханш өсөж эхлэнгүүт "шкураа буюу арьсаа" хамгаалж, Монголын сан хөмрөг барагдсан гэж дуугарснаар ам. долларын ханшийг бүр алдаж орхилоо. Ташуур өгсөн гэж хэлж болно.
Дараа нь сангийн сайд Б.Чойжилсүрэн нь нэг орой телевизээр учир зүггүй тайлан тавилаа. Яах гэж тавив? гэж асуух л үлдлээ. Ард иргэдээ айлгаж, түгшээх гэв үү? АН улс орныг сүйрүүлсэн гэх гэв үү? Бид ийм хүнд эдийн засгийг авч байна гэх гэв үү? Асуулт дагуулсан мэдэгдлийг тэр хийлээ. Улс орон хамгийн хүнд үедээ ирлээ гэж түгшүүр зарлан тэр мэдэгдлээ. Үнэн байж болох. Нөхцөл байдлаа таньж мэдэх нь чухал. Мэдэх ч үүрэгтэй, тэр хүн. Харин түүнийгээ эхлээд УИХ дээрээ, засгийн газартаа хаалттай яримаар юм. Ерөнхийлөгч гэж нэг хүн байгаа. Бас түүнтэй зөвлөмөөр юм. Б.Чойжилсүрэн тэгсэнгүй. Шууд л мэдээлэл хийлээ. Ард иргэд улс орны эдийн засаг хүндэрснийг ойлгосон. Тиймээс ч МАН-д саналаа өгсөн. Одоо харин эдийн засгийн энэхүү хүнд нөхцөл байдлыг хэрхэн давах гэж байгаа нь чухал. Гэтэл тэр хамгийн хүнд үед ирлээ гэж мэдэгдсэнээс яаж гарах гэж байгаагаа дурдсангүй. Сангийн сайдын хувьд эдийн засгийн нөхцөл байдлыг хамгийн түрүүнд мэдэх хүн нь Б.Чойжилсүрэн мөн байх. Харин ингэж яаран сандран мэдэгдэл хийх нь юунд хүргэх бол. Тэгтэл энэхүү мэдэгдэл хийх хүн нь сангийн сайд мөн үү ? ч гэж асуух асуулт үүднэ. Тэгэхээр ерөнхий сайд юу хэлэхийг хүлээх болов. Тэр УИХ-ын чуулган дээр тусгай хөтөлбөр хэрэгжүүлнэ гэж ам алдсан. Одоо ерөнхий сайдын тусгай хөтөлбөр гэгч нь юу болохыг харах үлдэв.
Эрх мэдэлтнүүдээс, намын эрх ашгаа улсын эрх ашгаас бүү дээгүүр тавиасай, өөрсдийнхөө арьсыг л хамгаалах өрөвдөлтэй алхам битгий хийгээсэй гэж хүсье. Хүндэрсэн байж болно. Гарц байх ёстой. Гарцаа олбол арга зам нь нээгдэнэ.
.JPG)
Нийтлэлч Ц.ЭНХБАТ
