Ийм нэгэн хэлэлцүүлгийг CONTROL.MN мэдээллийн сайт нээж байна. Хэлэлцүүлгийг тус сайтын нийтлэлч Ц.Энхбатын "76 ГИШҮҮН БОЛ ӨРТЭЙ ХҮМҮҮС" нийтлэлээр эхлүүлж байна. Та саналаа, нийтлэлээ манай хаягаар ирүүлээрэй.
УИХ-ЫН 76 ГИШҮҮН БОЛ ТӨРД АХ, ДҮҮ, ТӨРӨЛ ТӨРӨГСДӨӨ " ШАХДАГ" ШАХААНЫ МАШИН БОЛСОН
Хамгийн шаналгаатай хүмүүсийн тоонд УИХ-ын гишүүд оржээ. Байгууллагын дарга нарын " шүдний өвчин" болжээ тэд. Намын удирдлагаа аргадаж байж дэвшинэ. Дэвшсэн хойноо хандив мөнгө босгоно. Болсон хойноо тэд өрөө төлөхөөр ханцуй шамлан ордог. Тендерийг тэд л авдаг. Албан тушаалыг ч мөн тэд хуваарилдаг жишиг тогтсон. Үгэнд нь орохгүй бол эвсэж байгаад засгаа ч унагадаг, тэд. Тэдний гуйлга, шахаа нь төрийн албыг төрлийн алба, мэргэжлийн засгийн газрыг ах дүүгийн найрсаг сүлжээ болгон хувиргажээ.
Сонгуулийн хуулинд, өртэй хүнийг УИХ-д дэвшихийг хориглосон заалт бий. Маш чухал заалт. Гэтэл энэ заалт үйлчилдэггүй юм байна. УИХ-д нэр дэвшсэн, сонгогдсон хүмүүсийн дийлэнх нь "ӨРТЭЙ" гэдгийг бодохоор хууль огт хэрэгжсэнгүй. УИХ-ын гишүүнээр сонгогдсон 76-ын дийлэнх нь хэн нэгний мөнгө, санхүүгийн барьцаанд орсон байна. Их багаар дэмжсэн бүх хүмүүсдээ тэд өртэй болдог тухай нэгэн бяцхан судалгаа ч гарсан байна.
Улс орон яагаад өөдөлдөггүй юм бол гэтэл, "ӨРТЭЙ" хүмүүс ийнхүү бидний дээр гарчихсан, улс орныг удирдаад байдаг гажиг тогтолцоо нэгэнт бий болчихжээ. Тиймээс улс орныг бүхий л түвшинд мэргэжлийн баг удирдах боломжгүй болсон гэж судлаачид дүгнэлээ.
"Өртэй" хүмүүс өрөө төлөхийн тулд улс орны эрх ашгийг хувийнхаа эрх ашгаас доогуур тавьж эхэлдэгийн гол гогцоо нь энд буй ажээ. Чи надад, би чамд гэсэн наймаачин сэтгэхүйгээр улс орны хөгжлийг тэд хэрж торгоож чадсан байна. Өртэй хүмүүс, ийм сэтгэхүйтэй хүмүүсээр удирдуулаад, ийм тогтолцоогоор улс орон хэрхэн хөгжиж буйн гэрч нь бид боллоо. Өдрөөс өдөрт уруудаж буй амьдрал. Торгоож, аргалах биш, хөгжүүлж, цэцэглүүлэх үүрэгтэй бус уу?, гишүүд гэгдээд буй эрхмүүд!
Ц.ЭНХБАТ
