Чөлөөт бөхийн холбоо сахилга батгүй, дураараа, дээр нь ажлаа мэддэггүй. Ингэж спортын судлаачид дүгнэхэд хүрчээ. Дасгалжуулагч, багш нарын үйл ажиллагаа нь ингэж дүгнэхэд нөлөөлсөн. Эрэгтэй, эмэгтэй шигшээ багийн дасгалжуулагчид нь хоорондоо эв түнжингүй, ажлын уялдаа холбоогүй. Үүссэн асуудлын учир зүйг олохоос өмнө, дээр доргүй хэрүүл, заргаар шийдэхийг урьдаа барьдаг болсныг сүүлийн хэдхэн жилийн үйл явц харуулсан. Таалагдахгүй л бол хэвлэлийн бага хурал хийлгэж, олуулаа нийлж бөөрөлхөдөг. Урьд өмнө үзүүлсэн гавъяа шагналаараа бусдыг далайлгаж сүрдүүлдэг. Дэндүү явцуурсан. Ингэж ажиллаж хэвшсэн учраас чөлөөтийнхний амжилт буурч байгаа тухай мэргэжилтнүүд дурдаж байна.
Тамирчдынхаа үзүүлж болох амжилтыг тэд "угаалаа", үндсэндээ. Мэргэжлийн биш хандлагатай, цаг үетэйгээ хөл нийлүүлж чаддаггүй, мэдлэг чадвар дутмаг багш дасгалжуулагч нар тамирчныхаа амжилтыг хэрхэн доош нь татдагийг Рио-2016 олимп гэрчиллээ.
Монголчуудыг 7-8 медаль авна гэж америк, английн хэвлэлд бичиж , монголын жудо, чөлөөтийн бөхчүүд тэр таамагт багтаж байсан цаг саяхан. Тэгвэл тэр хүлээлт талаар нэг болсон. Энэ удаа олимпийн дээд рекорд тогтооно гэдэгтээ тамирчид, дасгалжуулагчид, албаныхан бүгд итгэсэн байсан. Тиймээс тамирчдадаа, нэг нэг хүн авч явах эрх олгосон гэдэг мэдээ ил болж эхэллээ. Тамирчид маань баяраа тэмдэглэх гэж эхнэр, нөхрөө Рио руу авч явцгаасан байна.
(1).jpg)
Харин ганцхан тамирчин, боксын Отгондалай л орон нутгаас багшаа авч явсан байна. Ингэж л зүүгээгүй медалиа зүүдэлцгээсэн байна, манайхан. Тэд ажлаа умартжээ. Бялуу зүүдэлж байсан байна. ОУОХ,түүний шүүгчдийн зөвлөлөөс зарласан техникийн зөвлөгөөнд Монголын дасгалжуулагчид суусан боловч, хэлний мэдлэг дутсанаас дутуу ойлгосон зүйл гарчээ. Дутуу ойлгосноос болоод буюу, огт ойлгоогүйгээс болоод тамирчнаа зөв залж чадсангүй.
Чөлөөтийн техникийн зөвлөгөөн дээр - Тамирчин илэрхий зугтаагаад байвал, тамирчинд огт сануулга өгөхгүйгээр, сүүлчийн 1 секундэд ч дэвжээний шүүгч тамирчныг торгоно гэж зааварчилгаа өгсөн байна. Үүнийгээ ч бичгээр баталгаажуулсан байжээ. Монголын дасгалжуулагч Цогтбаяр, туслах Баяраа нар бөхчүүддээ, тэр дундаа Мандахнаранд үүнийг анхааруулаагүйгээс монголчууд олимпийн хүрэл медалиа алдлаа. Тэр сүүлийн цөөхөн секундэд барилдалгүй, илэрхий зугтаасан. Энэ бол тамирчны түүхэнд үлдэх маш том сургамж болон бичигдлээ. Чөлөөт бөхийн барилдаан бол үндэсний бөхийн барилдаан биш. Уядаг, зугтдаг. Энэ бол шүглийн дуугаар эхэлж, шүглийн дуугаар төгсдөг спорт. Шүгэл дуугарахаас өмнө яллаа гэж баярлаж болохгүй. Ийм нэгэн сургамжийг монголын чөлөөтийнхөн дэлхийн чөлөөт бөхийн түүхэнд шигтгэлээ. Дасгалжуулагчдын гаргасан авир занг хэлэлцээд яах вэ? Сонирхолтой үйлдэл болсон. Гэхдээ хүчээр түрэх, заргаар давна гэдгээ цаашид орхих хэрэгтэй. Өмнө нь ч гэсэн ОХУ-ын Улаан-үүд хотод болсон олон улсын тэмцээний үеэр чөлөөтийн дасгалжуулагч Пүрэвбаатар мөн л шүүгчдийг эсэргүүцэж байж, торгууль хүлээсэн. Түүнд оногдуулсан 5000 швейцарь франкийн торгуулийг Их аварга Дагвадорж л төлсөн шүү дээ. Ажлаа хийж чадахгүй, үеэ өнгөрөөсөн гэдгээ Цогтбаяр тэргүүтэй дасгалжуулагч нар харууллаа. Тэдгээр тамирчид, дасгалжуулагчид, багш нарын өмнөөс их аварга Дагвадорж уучлал гуйж, ажлаа өгөхөөр мэдэгдлээ. Уул нь Цогтбаяр тэргүүтэй багш, дасгалжуулагч нар ажлаа нь өгөх нь шударга ёсонд нийцнэ. Чөлөөтөд хөдөлгөөн хийх шаардлагатай болжээ.
Ц.ЭНХБАТ
