Монголын чөлөөт бөхийн шигшээ багийн тамирчдыг олон улсын каленьдарчилсан бүхий л тэмцээнд оролцохыг түдгэлзүүлсэн шийдвэрийг Дэлхийн Нэгдсэн Бөхийн Холбооноос гаргасан байна. Түүнийгээ энэ сарын 25-нд Монголын Чөлөөт Бөхийн Холбоонд ирүүлжээ. Гаргасан шийдвэрийн дагуу, Монголын шигшээгийн эрэгтэй, эмэгтэй баг, залуучууд, өсвөрийн шигшээ багийнхныг тодорхой бус хугацаагаар дэлхийн аварга, олон улсын тэмцээнд оролцох эрхийг түдгэлзүүллээ гэж уг шийдвэртээ мэдэгдсэн байна.
Энэ асуудлаар МЧБХ яаралтай хуралдаж эхэллээ. Ямар ч гэсэн Залуучуудын Дэлхийн Аварга шалгаруулах тэмцээнд оролцохоор маргааш Парисыг зорих гэж байсан чөлөөт бөхийн залуучуудын шигшээгийн тамирчид эхний цохилтыг амслаа. Тэднийг тэмцээнээс хаслаа. Тэмцээнд оролцож чадахгүйгээс гадна, онгоцны тийзээ хатуу брониор захиалсан тэд мөнгөө ч буцааж авч чадахгүй хохирлоо. Дараагийнх нь, өсвөрийн тамирчид байх болно. Тэд Грузинд болох тэмцээний бэлтгэлд гарсан байсан. Энэ бол эрэгтэй эмэгтэй, насанд хүрэгчид, залуучууд, өсвөрийн тамирчдад бүгдэнд нь хамааралтай.
Холбооноос ирүүлсэн албан бичигт : "Монголын дасгалжуулагчид олимпийн тоглолтын 65 кг-ийн барилдааны төгсгөлд дэвжээн дээр гарч ирж, чөлөөт бөх, чөлөөт бөхийн холбооны үйл ажиллагаа, нэр төрд харшлах зүй зохисгүй үйлдэл, авир гаргасныг үндэслэн энэхүү шийдвэр гаргаснаа цохон тэмдэглэсэн байна. Хэдхэн жилийн өмнө, ОУОХ-ноос Олимпийн тоглолтоос Чөлөөт бөхийн төрлийг хасах шийдвэр гаргаж байсныг Дэлхийн Нэгдсэн Бөхийн Холбооноос эсэргүүцэн, асар их хүч, хөрөнгө, лобби, зүтгэл гаргасны хүчинд чөлөөт бөхийг олимпийн төрөлд үлдээснийг ч сануулсан байна. Тэгэж байтал Монголын хоёр дасгалжуулагч Цогтбаяр, Баяраа нарын зохисгүй үйлдэл чөлөөт бөхийн нэр төрийг дэлхий нийтэд гутаасан үйлдэл боллоо гэж үзжээ. Олон улсын олимпийн хорооноос Дэлхийн нэгдсэн бөхийн холбоонд ч анхааруулга ирсэн байна. Энэ бүхнийг үндэслээд, Монголын чөлөөт бөхийн холбоонд сахилгын арга хэмжээ авснаа мэдэгдсэн нь, энэ байна. Тамирчдыг дэлхийн каленьдарчилсан тоглолтод оролцуулах эрхийг 2 жил хүртэл хугацаагаар түдгэлзүүлэх эрхтэй юм байна. Гэхдээ энэ нь тухайн холбоо шийдвэрээ хэрхэн гаргахтай холбоотой байдаг тухай мэргэжилтэн тодотгож байна. Юуны өмнө, энэхүү сахилгын шийтгэлийг хэрхэн хүлээж авч байгаагаа, эсвэл эсэргүүцэж байгаагаа Дэлхийн Нэгдсэн Бөхийн Холбоонд 9-р сарын 1-ний дотор албан ёсоор мэдэгдэх ёстой. Эсэргүүцсэн тохиолдолд, дүрмийн хороонд хандах юм байна. Энэ бол шүүхдэнэ гэсэн үг. Шийтгэлийг зөвшөөрч байгаа бол, дасгалжуулагчдынхаа үйлдлийн талаар албан ёсны тайлбараа ирүүлэхийг бас шаардсан байна.
МЧБХ-ны ерөнхийлөгч нь дангаараа уучлал гуйх бол огт хангалтгүй. Холбооны удирдлагын нэгдсэн байр сууриа тодорхой илэрхийлж, албан ёсоор мэдэгдэхийг бас шаардсан байна. Ийнхүү Монголын чөлөөтийнхэн олимпоос ганц ч медальгүй ирсэн төдийгүй, гай чирч ирлээ. Өмнө нь Пүрэвбаатар бас зохисгүй үйлдэл хийж, Дэлхийн Нэгдсэн Бөхийн Холбооноос 5000 швейцарь франкаар торгуулж байсан нь ч нэрмээс болжээ. МЧБХ-ны тэргүүн Д. Дагвадорж ажлаа өгөх биш, улам сайн ажиллах цаг иржээ. Чөлөөтийн холбоог нэг гартаа зангидаж, сахилга, дэгтэй, мэргэжлийн холбоо болгож хөгжүүлэх салхи үлээлээ. Дэндүү өндөр үнэ төллөө дөө, үүний төлөө.
Ц.ЭНХБАТ