Мэргэжлийн засгийн газар гэдэг гоё үгээр, ард түмний сонорыг МАН мялаасан, сонгуулиар. Сонгогчид итгэсэн. МАН-ыг ухаарсан гэж бодсон. Хүний нөөц ихтэй МАН-ыг сонгочихвол, чадварлаг мэргэжлийн засгийн газар байгуулна гэдэгт итгэсэн. Тэгснээрээ, монголчуудын амьдралыг богино хугацаанд өөднө татна гэж найдсан. Ингэж л саналаа өгцгөөсөн. Одоо харин сонгууль ард хоцорч, МАН-ын төр, засгаа эмхлэх эх захгүй ажил ундарчээ. Гараанаасаа л, мэргэжлийн засгийн газар гэсэн үг замхарч эхэллээ гэх шүүмжлэл дуулдаж эхэллээ. Засгийн газрыг эхний 100 хоногт шүүмжилдэггүй гэдэг ойлголт ч үгүй болов. Томилгоо болгон асуудал дагууллаа. Томилогдсон сайд дарга нарын оруулж ирсэн төсөв, төлөвлөгөө нь ч шүүмжлэлд өртөв. Ялангуяа, сангийн сайдын татвар нэмэх, ард иргэдийн халаасанд " гараа дүрэх" санал тус намын өнгөлөн далдалсан багийг хууллаа гэж ажиглагчид дүгнэв.
Чойжилсүрэнгийн төлөвлөгөөг ард иргэдээ "хашраах" төлөвлөгөө ч гэж нэрлэжээ. Иймэрхүү зүйл хийх гэж байгаа юм байна гэж иргэд мэдэрлээ. МАН-ын нэр төрд харшлах маш хортой саналыг сангийн сайд нэгэнт зүтгүүлсэн. Үүнийг нь удахгүй болох орон нутгийн сонгуулийн өмнөх МАН-ын улс төрийн том алдаа гэж улс төрчид нэрлэж байна. Магадгүй, 2017 оны ерөнхийлөгчийн сонгуульд ч энэ алдаа нь нөлөөлөхийг үгүйсгэхгүй байна.
Баян хүн луувангаа иднэ үү, лаагаа иднэ үү, хэнд ямар хамаа байна вэ гэдэг шиг, ялсан нам томилгоогоо хийж байхад хэн юу хэлэх билээ. Тийнхүү томилгоо нь дүүрч, хэрхэн ажиллахыг нь харья гэж хүлцэнгүй зөвшөөрч байтал, ард иргэдийнхээ "халаасыг суйлах" гэсэн оролдлого нь иргэдийн бухимдлыг төрүүллээ. Мэргэжлийн гэх тодотголтой энэ засгийн газар ард иргэдийн итгэлийг ийнхүү алдаж, унан тусан бүдэрлээ. Ийм засгийн газар хэр удах вэ? гэдэг яриаг ч дагууллаа. Ард иргэдийн бухимдлаас гадна, томилгооноос үүдэлтэй МАН доторхи зөрчил хурцаджээ. Дээр нь, ерөнхий сайд нь кабинетээ мэдэхгүй байна л гэнэ. Томилогдсон сайд нар нь газар, хэлтсийн даргаа мөн л мэдэхгүй. Агентлагийн дарга нар нь хэлтсийн дарга нараа мэдэхгүй. МАН-ын шахааны хүмүүсийг л эдгээр сайд, дарга нар ажилд томилох үүрэгтэй. Энэ дарамт ч, ажлаа гэх сайд, дарга нарын эсэргүүцэлтэй бас тулгарчээ. Ёстой л, шуудайнд хийсэн үхрийн эвэр гэгч болох нь гэж хэлэх ч хүн олдож байна.Багаар ажиллах, мэргэжлийн байх гэдэг асуудал ийнхүү бүдгэрсээр.... Мэргэжлийн засгийн газар бус, намын шахааны хүмүүс улс орныг дахин 4 жил " удирдана"...
Ц.ЭНХБАТ