Энэ асуултад Ц.Элбэгдорж хариулах цаг ирнэ. Монголын ард түмний төлөө, Монгол улсын төлөө тэр юу хийв ээ? Ямар гавъяа байгуулав? Эс бөгөөс ямар гай тарив гэж? Тэр хүн ерөнхийлөгчийн сэнтийнээс зүгээр л нэг өдөр буугаад явахгүй, ажлаа тайлагнах нь тодорхой. Яагаад гэвэл, энэ улсын эзэд нь монголын 3 сая иргэн юм.
Анхны ерөнхийлөгч П.Очирбатыг ХЭЭГҮЙ
Хоёр дахь ерөнхийлөгч Н.Багабандийг ХИЙГҮЙ,
Гурав дахь ерөнхийлөгч Н.Энхбаярыг ХИЙДЭГ
Дөрөв дэх ерөнхийлөгч Ц.Элбэгдоржийг ХЭЛДЭГ хэмээн "цоллодог".
ХЭЛДЭГ ерөнхийлөгч маань АН-ын даргаар 2 удаа, ерөнхий сайдаар 2 удаа, ерөнхийлөгчөөр 2 удаа сонгогдсон. Ямар ч л гэсэн хувьдаа хувьтай л хүн гэж түүнийг хэлж болно. Түүний ажил үйлсийг ажиглавал, Монгол улсыг олон улсын тавцанд таниулах үйлсийг илүү түлхүү хийсэн гэж болох байх. Энэ жилийн АСЕМ болон хэдэн жилийн өмнө Монголд зохиосон Ардчиллын орнуудын зөвлөлгөөнийг энд дурдаж болох юм.
Харин гурван улсын тэргүүний уулзалт хийдэг болсныг нь төрийнхэн дөвийлгэдэг ч, бие даасан олон улсын судлаач, дипломат ажилтнууд түүнийг нь буруутгадаг. Жижиг орны хувьд, хөрш том гүрний удирдагчидтай нэг дор уулзалт зохионо гэдэг бол дипломат харилцааны хувьд ч, стратегийн хувьд ч, тактикийн хувьд ч засаж залруулах аргагүй алдаа гэж тэд үздэг, түүнийгээ ч илэрхийлдэг. Харин Ц.Элбэгдорж болон түүний баг үүнийг нь үг хэлсэн чинээ ч тоолгүй, уулзалтаа үргэлжлүүлсээр. Монголын өр нэмэгдэж, монголчуудын түрийвч нимгэрч, ард иргэдийн амьдрал доройтсон нь ерөнхийлөгч Ц.Элбэгдоржтой шууд холбоогүй ч, бас огт хамаагүй гэж хэлж бас болохгүй. Түүнийг ерөнхийлөгчөөр ажиллах эхний 4 жилд түүний удирдаж байсан АН, тухайн үед олонхи болсон МАН-тай нэгдэж МАНАН-гийн засгийн газрыг байгуулж, улс орныг удирдсан. Дараа 4 жилд нь, түүний 2 дахь удаагаа нэр дэвшсэн АН олонхи болж, Засгийн эрхийг барьсан. Өөрөөр хэлбэл, түүнд бүхий л бололцоо байсан гэж ажиглагчид дүгнэж байна. Тэр 8 жил ярив уу, хэлээд л байв уу?
Тэгээд тэр юу ХЭЛЭВ ЭЭ? Ард иргэд, улс орны хөгжлийн төлөө? Ингэж иргэд асууж эхэлж байна. Энэ асуултыг бусад дарга нарт ч бас хаяглах ёстой. Ц.Элбэгдорж бол уран илтгэгч. Сайхан ярьж чаддаг. Хэлэх бол хийхийн хагас гэж тэр өөрөө номлосон. Тэгэхээр хагас ажлаа хийсэн гэж үзэх үү? Хийсэн бол ямар үр дүнд хүргэв ээ? Одоогийн нөхцөл байдлыг хэрхэн дүгнэж байгаа бол? Нэгэнт 7 жил өнгөрчээ. Түүнд одоо 9 сарын хугацаа үлджээ. Энэ хугацаанд тэр юу хийх бол? Ажлаа өгөх үедээ, юу хийснээ ард иргэддээ тайлагнах байх. Харин түүний хийсэн ажил, санал санаачилгад ард иргэд үнэлгээ өгнө. Энэ бол соёлтой улс оронд байдаг л энгийн жишиг. Яагаад гэвэл, татвар төлөгч, иргэн хүн тийм эрх дархтай байдаг. Харин дарга нарт эрх дарх байх ёсгүй. Түүнд одоо дахин 9 сар байна. Бас ч юм хийвэл багадахгүй цаг хугацаа.
Ц.ЭНХБАТ