Өнгөрсөн 8-р сарын 31-нд Британийн уулчин Стивен Эдвард Нэйш Архангай аймгийн Хангай сумын Хангай ноёны оргилд гарах гэж яваад бусдын гарт амиа алдсан байдалтай цогцос нь олдсон юм. Тус хэргийг Улсын мөрдөн байцаах газрын Онц хүнд гэмт хэрэгтэй тэмцэх хэлтэс, Архангай аймгийн цагдаагийн хэлтэстэй хамтран шалгаж сэжигтэн этгээдийг саатуулсан байна.
Сэжигтэн этгээд нь Архангай аймгийн харъяат, 1981 онд төрсөн 34 настай эр Г гэгч байжээ. Түүнээс хохирогчийн биед явсан зарим зүйлийг эд мөрийн баримт болгон хураан авсан байна. Тухайлбал, талийгаачийн бичиг баримт, онгоцны тийз зэргийг хураан авчээ. Сэжигтэн Г нь өмнө нь 2014 онд эрүүгийн хуулийн хуулийн 145.1-ээр хэрэг үүсгэн шалгагдаж байсан бөгөөд 2016 онд мөн эрүүгийн хуулийн 145.2-оор шүүхээс нэг жилийн тэнсэн харгалзах ялаар шийтгүүлсэн байна. Сэжигтэнг цагдан хориод байгаа аж.
А.САЯН