Төр, нийгмийн нэрт зүтгэлтэн Маршал Юмжаагийн Цэдэнбалын мэндэлсний 100 жилийн ойд зориулсан “Алдар гавъяаны замнал” үзэсгэлэн Монголын Үндэсний музейд нээлтээ хийлээ.
Үзэсгэлэнгийн нээлтэд түүний хүү Ц.Зориг, ЗГХЭГ-ын дарга Ж.Мөнхбат, УИХ-ын гишүүн Ц.Нямдорж, БСШУС-ын сайд Ж.Батсуурь болон албаны бусад хүмүүс оролцлоо.
Монголын Үндэсний Музейн сан хөмрөгт Ю.Цэдэнбал агсанд холбогдох 700 гаруй эдлэл, хэрэгслээс 150 гаруй эдлэлийг үзэсгэлэнд дэлгэн үзүүлжээ.
УИХ-аар “Ю.Цэдэнбалын мэндэлсний 100 жилийн ойг тэмдэглэн өнгөрүүлэх тухай” тогтоолын төслийг баталсан. Харин Ойг тэмдэглэх зардлыг Засгийн газрын нөөц сангаас гаргахаар шийдвэрлэсэн билээ.
Үзэсгэлэн аравдугаар сарын 15-нийг хүртэл олонд нээлттэй байх юм.
А.САЯН
