Г.Занабазарын нэрэмжит Дүрслэх урлагийн музей үүсэн байгуулагдсаны 50 жилийн ойд зориулан сар шинийн өмнө “Ач авралт охин тэнгэрүүд ба Дара эх” үзэсгэлэнгээ нээлээ. Энэ нь тус музейгээс зохион байгуулж буй "Арван хангал" бурхдын III дахь удаагийн цуврал үзэсгэлэн юм. Үзэсгэлэнд Балданлхам, Бүжинлхам, Гүнжинлхам, Янжинлхам ба Цагаан дара эх бурхдаас бүрдсэн нийт 300 орчим бүтээлийг дэглэн үзүүллээ. Эдгээр бүтээлүүдийн 96 орчим хувь нь музейн сан хөмрөгөөс анх удаа олон нийтэд хүрч байгаа төдийгүй зурмал, оёмол, цутгуур, шуумал, баримал, модон барын дардас, сийлбэр зэрэг бурхан урлалын бүхий л төрлөөр бүтээгдсэн бүтээлүүдийг багтааж байгаагаараа бусад үзэсгэлэнгүүдээс онцлог юм.
.jpg)
Энэхүү үзэсгэлэн нь Монголчуудын төр ёсны их баяр цагаан сарын өмнө нээгдэж байгаа нь билэгшээл ерөөлийг эрхэмлэн зон олон Монголчууддаа ирж буй бичин жилдээ өсөн дэвжихийн билэгшээлийг давхар агуулж байгаа юм байна. Бурхны шашинт ард түмэн түүний дотор Монголчууд "Лхам" бурхныг ихэд эрхэмлэн шүтэж ирсэн байдаг. Монголчууд цагаан сарын битүүний шөнө Балданлхам бурхныг айл бүхэнд залран ирдэг хэмээн билэгшээн ундаасч ядарсан луусыг нь услаж байгаа утгаар гэрийнхээ тотгон дээрээ гурван ширхэг мөс тавьдаг заншил өдгөө бидэнд уламжлагдан хадгалагдсаар иржээ. Үзэсгэлэнгийн нээлтэн дээр СТА дуучин Д.Сарангуа “ Богд зонховийн залбирал мэгзэм “ дууг дуулсан юм.
СУРВАЛЖИЛСАН : П. ОЮУНСҮРЭН
