Энэ онд Гандангийн “Дашчоймпэл” дацан үүсэн байгуулагдсаны 280 жилийн ой тохиож байна. Ойн хүрээнд Эх нялхсын эрдэм шинжилгээний хүрээлэнгийн Төрөхийн хүндрэлтэй эхчүүдийн тасагт нийт гурван сая нэг зуун мянган төгрөгний үнэтэй тоног төхөөрөмжийг хандивлажээ.
Дашчоймпэл дацан нь нийт 150 хүний бүрэлдэхүүнтэй бөгөөд тоног төхөөрөмжийг худалдан авахад Гандангийн дацангуудын лам нар болон хөдөө орон нутгийн бүх хийдүүд оролцсон байна.
Энэхүү дацанг II Богд Лувсандамбийдонмэ Жэвзүндамба хутагт, түүний Ёнзин багш буюу Манзушри хутагт Донхор цорж Агваанжамбалданзан Өвөр Монголын Долоон нуур хэмээх газарт 1736 онд үүсгэн байгуулж байж. Улмаар 1756 онд Ар халхын Их хүрээнд нүүн ирэн суурьшсан байна. Хожим 1937 оны их хэлмэгдүүлэлтэд өртсөнөөр дэлхийн анхны их сургуулиас улбаатай олон зууны түүхтэй тус дацангийн уламжлалт сургалт, хурал номын үйл ажиллагаа бүрмөсөн хаагдаж, 1991 онд тус дацангийн номын үйл ажиллагаа дахин сэргэж одоогийн энэ дуганыг Монголын Бурхны Шашны Төв Гандантэгчэнлин хийд бариулснаар хуучны эрдэм номтой мэргэд, багш нарын хичээл шамдлаар уламжлалт гүн ухааны сургалтаа явуулсаар өнөөг хүрчээ.
А.САЯН
