Энэ сарын нэгнээс эхлэн жолооны үнэмлэхээ гэрийн хаягаараа авах боломжийг ЦЕГ-ын лицензийн төв, болон Монгол шуудан ХК олгож байна.
Хэрэв жолооч та хуучин шар үнэмлэхээ солиулах, хаяж гээсэн, үрэгдүүлсэн, хугацаа нь дуусан үнэмлэхээ дахин авахаар материалаа бүрдүүлэн өгсөн бол үнэмлэх захиалах үедээ шуудангаар хүргүүлэх захиалгын хуудас бөглөн, хаягийн мэдээллээ өгсөн тохиолдолд шуудангаар үнэмлэхээ хүлээн авах боломжтой.
Мөн Лицензийн төв олон улсын үнэмлэх хэвлэдэг болсонтой холбоотойгоор гадаадын аль ч улсад хүргүүлэх боломжтой болсон байна. Захиалга хүлээн авснаас хойш Улаанбаатар хот дотроо 24 цаг, орон нутагт ажлын тав хоногт багтан хүргэх юм байна. "Монгол шуудан" ХК нэг үнэмлэхийг 2500 төгрөгөөр хүргэхээр болжээ.
Ц.ХИШГЭЭ
