Монгол Улсын нийгэм эдийн засгийн энэ оны эхний 10 сарын үзүүлэлтийг Үндэсний статистикийн хорооноос өчигдөр танилцууллаа.
Оны эхний 10 сарын төсвийн алдагдлын мэдээллийг өнгөрсөн 9-р сарынхтай харьцуулахад, 1 сарын дотор 268.7 тэрбум төгрөгөөр нэмэгджээ. Харин эхний 9 сарын байдлаар улсын нэгдсэн төсвийн зарлага эргэж төлөгдөх цэвэр зээлийн нийт хэмжээ 2 их наяд 51.7 тэрбум төгрөгийн алдагдалтай байсан байна.
Мөн өрхийн нийгэм эдийн засгийн 2016 оны 3-р улирлын судалгаагаар нэг өрхийн сарын дундаж мөнгөн орлого 853.3 мянган төгрөг болж өмнөх оны мөн үеийнхээс 84.4 мянган төгрөгөөр буурлаа. Үүнтэй зэрэгцээд улсын хэмжээнд ажилгүй иргэд 118.8 мянга болж, үүнээс 61.2 хувь нь эрэгтэйчүүд, үлдсэн хувь нь эмэгтэйчүүд байгаа юм байна. Улсын хэмжээнд ажилгүйдлийн түвшин 3-р улиралд 9.4 хувь болж өмнөх оны мөн үеэс 3.1 пунктээр өсч, өмнөх улирлаас 1.0 пунктээр буурлаа. Нэг өрхийн сарын дундаж зарлага энэ оны 3-р улиралд 926.2 мянган төгрөг болж өмнөх оны мөн үеийнхээс 10.4 мянган төгрөгөөр буурсан үзүүлэлт гарчээ.
О.НАНСАЛМАА
