Иргэн, аж ахуйн нэгж байгууллагууд өөрийн эзэмшил, ашиглалтад байгаа газар болон орчны 50 метр хүртэлх талбайн цас, мөсийг арилгах үүрэгтэй байдаг. Мөн дүүргийн тохижилт үйлчилгээний компаниуд орон сууц болон гэр хороолол дахь туслах замуудынхаа халтиргаа, гулгаа, цэвэрлэгээг хариуцах үүрэгтэй. Орчныхоо 50 метр газрыг цэвэрлээгүйгээс иргэд халтирч унан гэмтвэл хуулийн дагуу хариуцлага тооцно гэдгийг нийслэлийн онцгой комиссын хуралдааны үеэр Улаанбаатар хотын Ерөнхий менежер Т.Гантөмөр хэлсэн юм.
Хот тохижилтын газар нийслэлийн 6 дүүргийн 116-р гудамжны 337,5 км авто зам буюу нийтийн эзэмшлийн талбайн цэвэрлэгээг хариуцан ажиллаж байгаа юм. Тэгвэл Нийслэлийн Засаг дарга бөгөөд Улаанбаатар хотын захирагч С.Батболд аж ахуйн нэгж, байгууллагуудыг цас, мөс цэвэрлэх ажилд идэвхтэй оролцохыг уриалсан бөгөөд өнөөдөр ГХЯ-аас ЗЦГ-хүртэлх замыг хотын удирдлагууд болон НЗДТГ-ынхан цэвэрлэж байна.
Гэтэл хувийн байгууллагууд ойр орчмын 50 метр газрын цасыг цэвэрлээгүйгээс болж мөн л хүмүүс халтирч унан, бэртэж гэмтсээр байна. Ойрын өдрүүдэд цас ихээр орж албан байгууллагаар үйлчлүүлэх хүний тоо багассаар байхад тэд ажилдаа түүртсээр зам талбайгаа цэвэрлэж, үүргээ гүйцэтгэхгүй байгаагаас болж олон хүн эрүүл мэндээрээ хохирч байна. Шаардлага, үүргээ биелүүлээгүй аж ахуй нэгжид хуулийн хариуцлага тооцож арга хэмжээ авна гэсэн хотын менежерийн үг хувийн байгууллагуудад тод сонсогдохгүй байгаа аж.
О.НАНСАЛМАА
