Улаанбаатар хотын харъяат М, Орхон аймгийн харъяат Н нар нь бүлэглэн бугын чив дөрөв, чонын гурван толгой, эрүү, ходоод 12, хүдрийн заар тав, бугын эвэр 20 кг-ыг Улаанбаатар-Эрээн чиглэлд хөнгөрсөн сарын 28-нд аялж явсан галт тэргэнд нуун өмнөд хөрш рүү гаргаж байсныг Дорноговь аймгийн Замын-Үүд сум дахь Сум дундын Цагдаагийн хэлтсийн албан хаагчид, ЭЦГ-ын Эдийн засгийн гэмт хэрэгтэй тэмцэх хэлтсийн ажилтнууд хамтран илрүүлж, шалгаж эхэлсэн байна.
Үүнээс өмнө мөн л дээрх чиглэлийн галт тэрэгний цуваанд нуун хил нэвтрүүлж, улсад их хэмжээний хохирол учруулж байжээ. Нэн ховор амьтанд тооцогддог нэг хүдрийн экологи-эдийн засгийн үнэлгээ нь 3-3,5 сая төгрөг, нэг буга 6,6-7,5 сая төгрөг гээд тооцохоор байгальд асар их хэмжээний хохирол учирсан нь тодорхой. Эд эрхтэн хууль бусаар хил давуулсан хүмүүс биедээ нуусан байсан гэдгийг эх сурвалжууд мэдээлжээ.
Ц.ХИШГЭЭ