Бүрэн эрх нь удахгүй дуусахаа мэдэрсэн өнгө аястай үгийг Ц.Элбэгдорж ерөнхийлөгч чуулганы нээлтэнд хэлэв. Тэр хэд хэдэн зүйлийг зөвшөөрөв. Улс орон өр ширэнд баригдсан. Авилга огт буураагүй. Төрийн бие нь данхайсан. Дэндүү томорсон биеийг нь хөл нь даахаа больсныг "Заан биетэй, хулгана хөлтэй" гэж оновчтой зүйрлэв. Дарга нар мөнгөнд шунагчид болж хувирсан. Төрөөр хөлжиж буй улс төрчид хувалз адил шигдсэн гэдгийг ч үгэндээ цохов. Ийм нэгэн ерөнхий зүйлийг төртэй хамаатуулан хэлэв. Эрдэнэтийн тухай асуудлаар байр сууриа илэрхийлэх болов уу гэдэг хүлээлт байсан. Эрдэнэт үйлдвэр гэж ганц үг ганхийсэнгүй. "Хүний өмнүүр орж бүхнийг хийх гэж оролддог төр бол хүнээс бүхнийг булааж дуусдаг" гэсэн үгийг төрд дайлаа. Эрдэнэт үйлдвэрийн хувьчлал, түүнээс улбаалсан шийдвэртэй холбож ойлгох ганц өгүүлбэр нь энэ л байлаа.
Монголын ард иргэдээс "дээрэмдсэн" Эрдэнэтийн 49 хувийг төр буцаан авах болсонд ерөнхийлөгч таагүй ханджээ гэдгийг энэ үг, өгүүлбэрээс олж харж болох нь гэж шинжээчид дүгнэж байна. Ц.Элбэгдорж ерөнхийлөгчийн хэлсэн үгийг анзаарвал санаагаа нэлээд далдалсан нь ажиглагдав. Нэмбэл, хэл нь цуцсан маягтай, сэтгэлийнх нь цөхөрсөн өнгө дуулдаж байлаа гэж боди хэл судлаачид тайлбарлав. Чалко-гийн өрийг 6-хан сарын дотор бүрэн барагдуулсан тухай, төр зөв менежмент хийж чаддаг жишээг таг сонсоогүй мэт дуугүй өнгөрлөө. Энэ бол түүний илтгэлийн гол санаатай тэрсэлдэх учир сонсоогүй, дуулаагүй мэт тойрлоо.
Гэтэл энэ хүн өөрөө юу хийгээ вэ? Өөрийнхээ 8 жилийн ажлыг дүгнээд л , өөртөө " 8,9 " гэсэн оноо өгөөд л байдаг. 10 онооноос шүү. Амласан ажлаа хийгээгүй юм биш үү, түүний илтгэлийг сонсоход. Авилга огт буурсангүй гэдгийг олон улсын байгууллага тогтоосон. Эдийн засаг унасан гэдгийг Элбэгдоржоор хэлүүлэлтгүй бүгд мэдэрч байгаа. Бүхэлд нь хэлбэл Монголын ард түмэн ядарсан, Монгол улс улам бүр хараат болсон. Тэгтэл, - Чимээгүй үхлийн тухай - Чимээтэй дуугарахаас өөр зам үлдсэнгүй гэж толгой холбосон үгийг ерөнхийлөгч хэлчихэв. Насанд хүрээгүй 10 охидын 7 нь үр хөндөлт хийлгэж, чимээгүй үхэл газар авсныг тэр ийнхүү шүлэглэв. Яаж ч чадахгүй нь байна гэнэ, Монгол улсын ерөнхийлөгч. Дээр нь Монголын залуус хар тамхинд живж эхэлсэн харангын дохиог Их хурлын индрээс дэлдлээ.
Ийм л Монгол улсыг дараагийн ерөнхийлөгчид хүлээлгэн өгөх гэж буй юм байна, Ц.Элбэгдорж. Энэ бол өөрөө өөртөө тавьсан үнэлгээ, дүгнэлт юм. Гэхдээ энэ бүхний бурууг Элбэгдорж ерөнхийлөгчид үүрүүлэх нь бас шударга биш. Монголын засгийн газар, Ерөнхийлөгчийн тамгын газар бас үүрэлцэх ёстой. Нийгмийн бодлого, Гадаад харилцаа, Эдийн засаг, Улс төр, Шашин, Соёл урлаг, Спорт, Хүүхэд залуучууд, Эмэгтэйчүүд, Олон нийт хэвлэл мэдээлэл, Хууль эрх зүй гээд тус бүрдээ хариуцсан орон тооны зөвлөх ерөнхийлөгчид бий. Эдгээр зөвлөх нь салбарын сайдаас ч өндөр эрх мэдэлтэй, тэднийг дуудах, үүрэг чиглэл өгөх эрх хэмжээгээр бүрэн хангагдсан байдаг. Тиймээс энэ том алба нь эрхээ эдэлснээс, үүргээ биелүүлээгүй байна гэж хэлж болох нь. Бүх бурууг Ц.Элбэгдорж ерөнхийлөгчид үүрүүлж болохгүй. Гэхдээ Элбэгдорж ба түүний баг ийм л улс орныг дараагийн ерөнхийлөгчид хүлээлгэн өгөх нь.
Нийтлэлч Ц.ЭНХБАТ