Оффшорчид болгоомжилж байна. Оффшор данс бий, оффшор компани бий, харин оффшорт мөнгө байхгүй гэж улс төрчид, тэдний үр хүүхэд ар араасаа дуу авалцан дуугарах болов. Монголын төрд оффшортонгуудыг ажиллуулахгүй гэх УИХ-ын даргын байр суурь оффшортонгуудыг тийхүү доргиож эхэллээ. Албан тушаалд томилогдох, 2020 оны УИХ-ын сонгуульд нэр дэвших эрхээ хасуулна гэхээс оффшорчид түгшжээ. Тэд оффшор компани, оффшор данстай гэдгээ зөвшөөрсөн ч, дансандаа мөнгөгүй гэж хотын дарга асан Э.Бат-Үүлийн хүү Чулуудайгаас өгсүүлэн зүтгэж эхэллээ.
.jpg)
Яг одоогоор оффшор дансанд хэн гэдэг улс төрчийн хэдэн сая ам.доллар байгааг бүрэн тогтоож чадаагүй. Гэхдээ л Монгол улсын төсвөөс давсан мөнгө тэнд байрлаж буй таамаглалыг иргэд дэвшүүлж эхэллээ. Гадаадын мэргэшсэн эдийн засгийн алуурчдад Монголын их баялаг болох Оюутолгойг найр тавьсан тэр цаг үетэй давхцан Монголын улс төрчид хөлжиж, оффшорт данстай болсныг Олон улсын эрэн сурвалжлах баг анх дэлгэсэн. Оффшор дансандаа 1 сая гаран ам.доллараа ор мартсан С.Баярцогт бол тэдний эхнийх нь. УИХ-ын дэд даргын албан тушаалаас бууснаа "шийтгүүлсэн, зохих хариуцлагаа хүлээсэн" мэт инээдтэй тайлбар хийхдээ огт ичээгүй нэгэн. Сүүлийн 20 жил УИХ-ын гишүүнээр тасралтгүй сонгогдож, сонгогдох тоолондоо давхар дээл өмсөж ирсэн түүнийг шалгах эрх хэнд ч байгаагүй. УИХ-ын гишүүний халдашгүй дархан эрх гэдэг бол түүнийг хамгаалах найдвартай, нэвтрэшгүй бат бөх "цайз" болж байсан. Гэхдээ 2016 оны УИХ-ын сонгуулиар сонгогчид түүнийг энгийн иргэдийн эгнээнд шилжүүлсэн. Тэр Гарамгайбаатар, Фортуна Батбаяр нарын ижил халдашгүй дархан эрхээ алдсан. Түүнийг шалгах эрх энгийн нэг мөрдөн байцаагчид нээгдсэн байна. Швейцарьт Баярцогт оффшор дансандаа хэрхэн 1 сая ам.доллартай болсныг нь эрэн сурвалжилж эхэлсэн.
Оюутолгойн гэрээтэй давхцан С.Баярцогтын оффшор дансанд эхний 1 сая гаран ам.доллар байршсан байдаг. Энэ бол С.Баярцогт Монголын Засгийн Газрын сангийн сайд байх цаг үетэй давхцаж буй. 2009 онд мөн ихээхэн хэмжээний мөнгө байршсан мэдээлэл бий. Батлагдаагүй тоогоор 9 сая гаруй ам.долларын тоо яригддаг. Нийтдээ 11 сая ам.долларыг ямар бизнес эрхэлж олов гэдгийг тогтоохоор Швейцарийн хуулийн баг ажилдаа орсон байна. Монгол улс, Швейцарийн хооронд эрүүгийн гэмт хэргийг хамтран мөрдөх үйл ажиллагаа эрхлэх талаар хамтын ажиллагааны гэрээ байхгүй учир Монголд ирж үйл ажиллагаагаа эрхлэх боломжгүй байгаа тухай холбогдох эрх бүхий хүмүүс тодотгож байна.
Энэ асуудлыг мухарлахаар Байгаль орчны хуульч Туяацэцэг болон түүний баг Швейцарьт нэг бус удаа ажиллаад ирсэн мэдээлэл бий. Одоогоор С.Баярцогт гэгч хэрхэн хөлжсөн тухай асуудлыг мөрдөхөөр Монголын хууль хүчний байгууллага нягталж эхэлжээ. Улсад ажилласан 20 гаруй жилд С.Баярцогт ам.долларын саятан болох хэмжээний бизнес эрхлээгүй гэдэг нь ил болжээ.
Нийтлэлч Ц.ЭНХБАТ
