1990 оны эхээс Монголчууд Солонгосыг зорих болсон. Тэнд ажиллаж, цалингаа Монгол руу илгээж ар гэрээ тэжээж тэтгэдэг байсан. Тэр үед Солонгосоос их хэмжээний бэлэн мөнгө Монгол руу урсдаг байсан. Бэлэн мөнгөнөөс гадна машин, сэлбэг, бусад барааны хэлбэрээр ч Монголын зах зээлийг тэтгэж байсан түүх бий.
Тэгвэл цаг өөрчлөгдөж, Монголоос их хэмжээний мөнгөн урсгал Солонгос улсын хил даван урсдаг болжээ. Монголын цөөхөн хэдэн телевиз Солонгосын олон ангит уран сайхны гаргасны төлөө жилдээ 5 тэрбум төгрөг төлж байна. Дээр нь Монголоос Солонгосыг зорих "Эмчилгээний зориулалт бүхий томоохон аялалын маршрут" хэдийнээ бий болжээ.
Солонгост эмчилгээ хийлгэж, эмнэлгүүдэд нь мөнгө төлж байгаагаараа Монголчууд эхний 1-2-р байрыг хуваалцдаг болсон байна. Энэ бол хэдэн арван тэрбумаар хэмжигдэх тоо гэнэ.
Дээр нь Монголын улс төрчид, бизнесмэнүүд Солонгосын казинод тэрбум тэрбумаар мөнгөө "тушааж" байна. Тиймээс ажиллах хүчнээс гадна, зөвхөн казинод тоглох Монголчууд, эмнэлэгт үйлчлүүлэх бизнесийнхэнд зориулж тусгай хөтөлбөр гаргаж ажиллах болсон гэнэ.
Хөтөлсөн Ц.ХИШГЭЭ
