Баянзүрх дүүргийн 5,22-р хороо, Монелийн уулзвараас урагш засмал хүртэл шинээр тавьсан зам цөмөрч машин явах нөхцөлгүй болжээ. Уг замыг Авто замын хөгжлийн газрын захиалгаар “ОДНД” ХХК 6-р сарын 6-аас 7-р сарын 6-ныг хүртэл барьжээ. Гэвч нээлтээ хийгээд 4 хонож байгаа уг зам цөмөрч, нурсаар машин болон явган хүн явах нөхцөлгүй болжээ.
Энэ мэдээллийг “Зөв амьдрах ухаан” ТББ-ын тэргүүн н.Загдаа Live хийснээр олон нийтэд хүргээд байгаа юм. Цэцэрлэгийн хүүхдүүдийн ундны усыг авахаар явж байсан портер маркийн автомашин нь уг зам дээр цөмөрч, гарах боломжгүй болсон бөгөөд 2-3 дугуй нь хагарч, тэнхэлэг тохиргоо нь алдагджээ. /Бичлэгийг хавсаргав/
Нийслэлийн замын сангийн 300 сая төгрөгөөр баригдсан 300м уг замын нээлтэн дээр хотын мээр С.Батболд ирж тууз хайчилж, сүржин нээлт хийсэн талаар ч оршин суугчид онцолж байна.
Гэвч нүглийн нүдийг гурилаар хуурсан уг ажлыг хэн хүлээн авч, ямар хяналт хийсэн болоод өнөөдөр ингэж нурж, сүйдэж байгааг мэдэх, хариулт өгөх хүн гарч ирээгүй байна.