Коронавирус туссан суурь өвчтэй хүмүүс хамгийн түрүүнд чад хийхийг ажиглалаа. Үүнтэй ижил суурь системийн хямралтай Монгол шиг улс орон давхар давхар хямралд нэрвэгдвэл яах вэ? Үндсэн хуульд эрх баригчид дахин “гар хүрэх”, засвар оруулах ямар ч боломжгүй.Хуульд зааснаар Засгийн газарт дѳрвѳн л гишүүн давхар дээл нѳмрѳх учиртай. Засгийн газрыг шинээр эмхлэн байгуулах ёстой гэдэгтэй хуульч Ч.Өнөрбаяртай бүрэн дүүрэн санал нийлнэ. ГЭВЧ…нэг асуудал байна. Хуулиа мѳрдѳх гэж байгаад засаглалын хямрал эхлүүлчих вий. Тэр нь даамжраад Үндсэн Хуулийн хямрал болон өргөжиж, үүний дээрээс давхар хямралууд нэрвэх бол юунд хүрэх бол гэж болгоомжилно. СӨНӨХ ГЭСЭН ГАНЦХАН ЗАМ Л ТОСОЖ БАЙХ ВИЙ!! Иймээс “давшилтад” бэлдэж, зөвхөн дохио хүлээж байгаа “манай талынханд” хандаж хэлэх үг байна: “Давших ч яахав, нэг эхэлбэл дуусашгүй сунжирсан байлдаан үргэлжилнэ . Коронагийн “хорт утаа” фронтын шугамыг бүрхээд байгаа нөхцөлд “давшсан” бид ч, “хориглосон” тэд ч хамтдаа сүйрнэ. Иймээс давшилтаа түр хойшлуулъя. Сонгуулиар л нэг мөсөн “давшъя” гэж уриалах байна. Одоо бид бүхний жинхнээсээ анхаарвал зохих асуудал бол корона вирус, түүнээс үүдэн гарч буй даяар хямралд бэлтгэх явдал юм. Ерөнхийлөгч Х.Баттулга бизнес эрхэлж байсан хүний хувьд хямралын аюулыг хамгийн түрүүнд түрүүнд мэдэрсэн юм. Иймээс тэр “хямралд бэлтгэе” гэж ард түмэндээ уриалсан дэлхийн (!!!) анхны төрийн тэргүүн мөн. Энэ нь туйлын зөв бөгөөд цорын ганц бодит санал юм. Гэтэл юу вэ ? Түүний өөдөөс нь “ганц хүний засаглал тогтоох гэлээ” гэж мушгин дайрч байна. Ний нуугүй, шууд хэлэхэд хямралын үеэр эрх мэдлийг төвлөрүүлдэг нь зүй тогтол. Хөрөнгө мөнгө, хүн хүчээ зөв хуваарилахаас гадна хурдан шуурхай шийдвэр гаргаж болдог учраас энэ аргыг түр хэрэглэдэг. “Ардчиллаа хөгжүүлж”, хямралаас гарч байсан улс гүрэн ганц ч байхгүй… Бүрэн зураглал нэвтрүүлгээр оролцсог Занданшатар дарга: “Одоо улс төржих цаг биш” гэж хэлж байна. Би үүнийг маш зөв гэж бодож байна. Хямралд бэлтгэх бүхий л ажилд саад болж, бул хар чулуу шиг хөндлөн хэвтчихээд “төсвийн тодотгол хийхгүй”, “сонгууль хойшлуулахгүй” гэж “гүрийгээд” байгаа Ч.Хүрэлбаатарыгаа “борцлоод хаячих”. “Үй түмэн” конторын барилга барьж хямралаас гарна гэж юу яриад байна, тэр!! Ойрын 1-2 жилд хямралаас шалтгаалан манай эдийн засгийг “өсгөх” ямар ч боломжгүй, харин чадвал хүрсэн түвшингөө хадгалах, ядвал аль болох бага унагах зорилт тавих нь зүйд нийцнэ. Үүний тулд сонгуулийг хойшлуулж, төсвийн тодотгол хийхээс эхлэх ёстой. Энийгээ л хийгээч дээ… “Тулсан зовлонг туулж бардаг, үлдсэн зовлонг үүрч бардаг” хорвоо шүү дээ…
Судлаач Х.Д.Ганхуягийн постоос. / 2020 оны 04 дүгээр сарын 11/