Монголын" хөх сувд " болсон, цэнгэг усны нөөц Хөвсгөл далайгаас 35 жилийн өмнө живсэн Сүхбаатар хөлөг онгоцыг татан гаргасан. 309 тонн хүнд жинтэй , далайн ёроолд гүн шигдсэн Сүхбаатар хөлөг Монголын онцгой байдлын баг гаднын тусламжгүйгээр өөрсдөө татаж гаргаж чадсан. Уг хөлөг онгоцыг далайгаас татаж гаргах, цэнгэг усаа хамгаалах санаачилгыг Монгол улсын ерөнхийлөгч санаачилж, Монголын усчин аврагчид гүйцэтгэсэн. Энэ бол маш том сургуулилт болсон. Амжилттай ч хэрэгжүүлсэн. Үүнд урамшсан Монголын усчин аврагчид ирэх зунаас Хөвсгөл далайд живсэн бүхий л машин техникийг татаж гарган, далайгаа цэвэрлэхээр зэхжээ. -Хөвсгөл далай бол Монголын төдийгүй, дэлхийн цэнгэг усны нөөц. Цэнгэг уснаас үнэ цэнтэй зүйл гэж дэлхийд байхгүй. Тонн тонн алт ч балга цэнгэг усны үнэд хүрэхгүй, үнэндээ. Цэнгэг усыг хамгаалах асуудлаар би Хөвсгөл далайд хоёр удаа очиж, далайг бүтэн тойрч, тал талаас нь ажигласан. Хөвсгөл далайд живсэн бүх автомашиныг татаж гарга. Энэ бол Зэвсэгт хүчний Ерөнхий командлагчийн өгч буй үүрэг. Шаардлагатай тоног төхөөрөмжүүдийг авахыг даалгая хэмээн Монгол Улсын ерөнхийлөгч У.Хүрэлсүх ОБЕГ-ын бие бүрэлдэхүүнтэй уулзахдаа үүрэг өглөө. Ийнхүү 2024 он гэхэд Хөвсгөл далайд живсэн бүх машиныг далайн эрэгт гаргаж, нуурын цэнгэг усыг хамгаалах боллоо.
