Өчигдөр Бельгийн нийслэл Брюссель хотод цуврал халдлага боллоо. Хамгийн сүүлийн мэдээгээр, нисэх онгоцны буудалд болсон хоёр дэлбэрэлт, хотын гудманд болсон бас нэг дэлбэрэлтийн улмаас 34 хүн амь үрэгдэж, 230 гаруй хүн шархдаад байна. Тус халдлагыг “Лалын улс” бүлэглэл хийсэн хэмээн өөрсдөө мэдэгджээ. Бельги улс алан хядагчдын эсрэг тэмцэж байгаа эвслийн гишүүн учраас халдлагыг үйлдэх шалтгаан болсон гэжээ.
Тус улсын хотын захирагчийн мэдээлснээр алан хядагчид таксигаар нисэх буудалд ирээд,тээшний тэргэнцэр дээр бөмбөг нуусан чемодануудаа зөөн авч явжээ. Алан хядагчдын хоёр нь амиа золиосолсон бол гурав дахийг нь эрэн сурвалжилж байгаа юм.
Бельгийн эрх баригчид гурван өдрийн гашуудал зарлалаа. Халдлагад амиа алдагсдад хүндэтгэл үзүүлэн зарласан гашуудлын хугацаа өнөөдрөөс эхэлж байна.
А.САЯН
