Утас чагнадаг болжээ. Өмнө нь ч энэ тухай сонсож байсан. Анхандаа итгээгүй. Гэтэл бодитой гэнэ. Нууцаар биш бүр албан ёсоор, хууль журмын дагуу дурын иргэний утсыг чагнах эрхийг Тусгайгынхан эдэлдэг болоод удаж байна гэнэ шүү. Одоогоос нь 20 жилийн тэртээ багш нар жагсаал хийж, уг жагсаал цуглааныг зохион байгуулагч нэгэн багшийн утасны яриаг чагнасны төлөө Жасрайг ерөнхий сайд байхад нь огцруулахыг шахаж байсан Элбэгдорж нь хүртэл ерөнхийлөгчээр сонгогдсон 8 жилд нүдээ аньж, чихээ бөглөсөн гэнэ.
Түүний мэдлийн хүрээний прокурор, шүүх, хууль хүчнийхэн иргэдээ тагнах, чагнах үйл ажиллагааг таслан зогсоох талаар нэг ч оролдлого хийгээгүй гээд бодчих доо. Ардчилалын бэлэг тэмдэг, иргэддээ ээлтэй байхаа тунхагласан хүн шүү дээ тэр чинь. Түүний үед л иргэдээ ийнхүү ил тод чагнадаг суурь тавигдчихлаа. Баттулга үүнийг өөрчилж чадах болов уу? Улс орныг ээлжлэн эрх барьж Монгол улсаар "тоглож " буй МАН, АН түүнд боломж олгох болов уу. Дуугарах иргэн ч байхгүй болжээ, баривчлагдахаас айгаад.
Өмөөрөх, хамгаалах, өмнөөс дуугарах зоригтон үгүй явж ирлээ. Өмгөөлж босох хүн нь Баттулга ерөнхийлөгч л байж болох юм. Эвэртэн туурайтан бүхний өөр хоорондын аминчхан яриаг хүртэл нэлэнхүйд нь чагнаж байна гэнэ, хүсвэл.
Иргэний, хэрэглэгчийн мэдээллийг нууцлах үүрэгтэй үндэсний гэх тодотголтой мобиком, скайтел, юнител, g-мобайл гээд үүрэн телефоны компаниуд иргэн хэрэглэгч нэг бүрийн хувийн мэдээ мэдээллийг чандлан нууцлах үүргээ ч хамгаалж чадахгүйд хүрчээ.
Ийм л цаг үед амьдарч байх юм. Өнөөдөр Таныг биш гэхэд таны хүүг, таны нөхрийг, таны журмын нөхрийг чинь ах дүүг чинь сонсож, чагнаж байна. Хэн үүнийг таслан зогсоох бол? Баттулга чадах болов уу? Айн...
А.НЭРГҮЙБААТАР
