Өмнийн говь нутгийн зүүн урд талаар зуны эхэн сарын тэнгэр хураа хайрлаж гурван өдөр зүсэн бороо орж хүн зоны магнай тэнийн баяр жаргал авчирлаа хэмээн Баян-Овоо сумаас Аюушийн Амгаланбаатар дөнгөж сая мэдээллээ. Өмнөговийн Ханбогд, Баян-Овоо, Номгон, Цогтцэций, Даланзадгад сумын нутгаар орсон зөөлөн бороо Баян-Овоо сумыг бүрэн хамарч өчигдөр орой завсарлан өнөөдөр говийн наран ээсэн сайхан өдөр болж байна. Хур тунадас бага ордог говь нутагт хавар тэр тусмаа зуны эхэн сард олон хоног зүсэрсэн их устай бороо ойрын хэдэн жилд ороогүй гэдгийг А.Амгаланбаатар онцоллоо.Тэрбээр элсэн говийн их далайн хөлөг хэмээн нэрлэгддэг тэмээн сүргээ сүүлийн жилүүдэд түлхүү өсгөж байгаа малчид маань өнөө маргаашгүй зуны шинэ сарын эхний шимт ургамал хүмүүл таана түрүүлэн ургана хэмээн сэтгэл хөдлөн хүлээж байна гэсэн үгийг давхар дайлаа.
С.ЭРДЭНЭЦЭЦЭГ
