Дарханы тэнгэрт 2006 оны шинэ жилийн эхний өдөр нар тав болж харагдсан сонин үзэгдэл тохиосон. Үдээс өмнө 10 цаг 30 минутанд гудманд хүмүүс гарч нар харцгаажээ.
Цаг уурчдын шинжсэнээр энэ нь наранд баганатай их хүрээ татсан байна. Ийм тохиолдол ховор тааралдаг гэнэ. Дарханд нарны энэ багана, их хүрээ хоёр нь энэ удаа хамтдаа 3 цаг гаруйн хугацаанд үргэлжилж харагджээ. Нарны туяа их хүйтэн цаг агаартай тэнгэрт гэрлийн хугаралд орж солонгорон хачин үзэсгэлэнтэй болж үзэгдсэн нь энэ ажээ. Нарны баруун талын багана нь гурван нар болж нөгөө эсрэг талд нь дахин хоёр нар шиг гэрэл ойж харагдсанаас болоод тэнгэрт таван нар мэт үзэгдсэн гэдгийг цаг уурчид тайлбарлажээ. Байгалийн өвөрмөц сонирхолтой энэ дүрслэлийг ТВ-9 телевизийн ИНФО үндэсний мэдээллийн сүлжээгээр Дархан хотоос тэр дор нь дамжуулан үзүүлсэн нь баримт болон үлдсэн байна.
С.Эрдэнэцэцэг. Дархан-Уул.