Байгаль орчин аялал жуулчлалын яамнаас “Ойн салбарын үндэсний чуулган”-ыг арваннэгдүгээр дүгээр сарын 08-15-ны өдрүүдэд Монгол Улсын Ерөнхийлөгчийн ивээл дор Улаанбаатар хотноо зохион байгуулж байна.
Эхний өдөр “Төр, хувийн хэвшлийн хамтын ажиллагаа” сэдвийн хүрээнд хэлэлцэж байгаа бөгөөд хашаандаа мод тарьж буй иргэдээ хэрхэн дэмжих, 1 тэрбум мод тарих үндэсний хөдөлгөөнийг хэрхэн явуулах талаар ярилцана.
Чуулганы үеэр БОАЖ-ын сайд Н.Уртнасан:
Мод үржүүлгийн газруудад арилжааны банкуудтай хамтран, зээлийн шинэ бүтээгдэхүүн олгох зэргээр ААН-үүдээ дэмжих шаардлагатай. Байгаль орчны салбарт 20 орчим төсөл 130 орчим сая ам.долларын санхүүжилттай хэрэгждэг. Үр дүнтэй үр дүнгүй сургалт явуулдаг, ном хэвлэмэл тараадаг зэрэг үргүй зардлыг багасгаж, бодит төсөл хөтөлбөрөө нэмэгдүүлэх тал дээр өнөөдрийн хуралдаанаар ярилцана.
Уул уурхайн компаниуд 189 сая мод тарьж ургуулах амлалтаа өгөөд байна. Гэр хорооллын айл өрхүүдийг мод тарих боломжтой эсэх талаар томоохон судалгааг өнгөрөгч хавар хийсэн. Нийт 25 мянган суулгацыг нийслэлийн 100 хороонд үнэгүй өгч, мод тарьж өгсөн.
Гэр хорооллын иргэд мод тарих хүсэл сонирхол маш өндөр байна. Харин мод тарихад үүсэж буй зардлыг хэрхэн шийдэх, хэрхэн бодит дэмжлэг үзүүлэх хууль эрх зүйн орчин нь тодорхой бус байсан. Цаашдаа бодит урамшуулал олгох хууль эрх зүйн орчинг бүрдүүлэх шаардлагатай.
Хөрсний бохирдлыг бууруулах, мод тарих ажлыг төрөөс бодлогоор дэмжиж явахаас өөр аргагүй. Салбар яам гэр хороололд мод тарих ажлыг бодитойгоор дэмжинэ.
