Булган аймагт Олон улсын хүүхдийн эрхийг хамгаалах өдөр Орон нутгийн төсвийн 2,7 тэрбум төгрөгийн хөрөнгө оруулалт бүхий усан спорт сургалтын төвийн нээлт боллоо. Аймгийн Засаг даргын “Шинэ Булган” үйл ажиллагааны хөтөлбөрт тусгагдсан томоохон хөрөнгө оруулалтын нэг нь Усан спорт, сургалтын төвийг Булган аймагт байгуулах ажил байсан юм. Одоогоос 1 жилийн өмнө шаваа тавьж байсан Усан спорт, сургалтын төв нь аймгийн төвд сүндэрлэн босож, хүүхэд залуучуудыг усан спортоор хичээллэх орчин нөхцөлийг бүрдүүлээд байна. Нэг ээлжиндээ 16 хүн хичээллэх боломжтой 25 метрийн урттай усан спорт сургалтын төв маань хүн амыг бие бялдраа чийрэгжүүлэх, усан спортоор хичээллэх, цаашлаад Усан спортын улс, тив, дэлхийн тэмцээнүүдэд амжилт гаргахад ихээхэн ач холбогдолтой ажил болсон. Тус төвд усан спортоос гадна аэробек, фитнесс клубууд хичээллэнэ гэж Булган аймгаас мэдээллээ.
