Хятадын Соёлын баяр Архангай аймгийн төв Цэцэрлэг хотод гурав хоног үргэлжлэв. Монгол улсад суугаа Хятадын ЭСЯ, Улаанбаатар дахь Хятадын Соёлын Төв, Архангай аймгийн Засаг даргын тамгын газар, Монголын Соёл Урлагийн холбооноос хамтран зохион байгуулсан соёлын баярт архангайчууд өргөн олноор оролцсон байна.
Цэцэрлэг хотод нээгдсэн Хятадын танка уран зургийн үзэсгэлэнг монголчууд өргөн олноор сонирхсон бөгөөд, үзэсгэлэнгийн зэрэгцээ Өвөрмонголын Ордосын Үндэсний дуу бүжгийн чуулгын уран бүтээлчдийн концертыг архангайчууд тольдсон байна.
Өвөрмонголын Ордосын үндэсний дуу бүжгийн чуулгын уран бүтээлчид Архангай аймгийн Ихтамир зэрэг зарим сумдаар аялан тоглолт хийснээр энэ удаагийн Хятадын Соёлын баяр өндөрлөсөн тухай Синхуа агентлаг мэдээллээ.
Ц.ХИШГЭЭ