Дорнод аймгийн төвд долоон настай хүү учир битүүлгээр амиа алдсан хэрэг энэ сарын эхээр гарчээ. Талийгаач хүү ЕБС-ын хоёрдугаар ангид суралцдаг байсан ба хэргийг анх цагдаагийн байгууллагаас утасны цэнэглэгч ашиглан хоолойгоо боож амиа хорлосон гэж үзсэн боловч мөрдөн байцаалтын явцад өс хонзонгийн сэдэлтэйгээр санаатайгаар амь насыг нь хохироосон болох нь тогтоогдсон байна. Нас барсан хүүгийн аав гэр бүлээс гадуур харилцаатай байсан нь хүүгийн амь насыг бүрэлгэх шалтгаан болсон аж.
Тодруулбал, талийгаач хүүгийн эцэгтэй дотно харилцаатай гэх С гэгч эмэгтэй бусдад 200 мянган төгрөг өгч хүүгийн амь насыг захиалгаар хөнөөлгөсөн болох нь мөрдөн байцаалтын явцад тогтоогдсон тухай эх сурвалж мэдээлж байна. Сэжигтэн С нь өөрөө нэг нас гарантай нялх хүүхэдтэй бөгөөд одоогоор талийгаачийн эцэгтэй хамт саатуулагдан шалгагдаж байна. Гэр бүлийн таарамжгүй харилцаанаас үүдэн амь насаа алдсан бяцхан хүүгийн дурсгалд зориулж Дорнод аймгийнхан энэ сарын 28-нд буюу маргааш зул өргөх ёслол хийхээр болжээ.
Л.ГАНТУЯА
