Куба улсын хувьсгалч, Кубын ард түмний их удирдагч 90 насандаа өвчний улмаас таалал төгсөв. Кубын засгийн газрын зүгээс 9 хоногийн гашуудал зарлалаа.
Түүнийг 12-р сарын 4-ний өдөр Кубын зүүн урд зүгт орших Сантьяго хотод оршуулах болжээ. Түүнийг нас барсантай холбогдуулан, Хятад, Орос, АНУ, Герман, Англи гээд дэлхийн бүх улс орны удирдагчид гашуудлын цахилгаан утас илгээж байна.
Зөвхөн улс төрчид ч биш, мөн спорт урлагийн алдартнууд ч эмгэнэлээ илэрхийлсээр байна. Аргентиний алдарт хөлбөмбөгч Диего Марадона,-Фидель Кастро бол миний хоёр дахь аав. Би Кубад 4 жил амьдарч эмчилгээ хийлгэсэн. Аргентинд намайг зүрхэлж эмчлэх эмч, эмнэлэг олдоогүй үед Куба улс хаалгаа нээж, эмч нар нь гараа сунгаж, миний амийг аварсан. Тиймээс Куба бол миний хоёр дахь эх орон, Фидель Кастро бол миний 2 дахь аав минь гэж тэрбээр гашуудалдаа өгүүлжээ.
Кубын хувьсгалын эцэг Фидель Кастро нь улс орноо 50 жил удирдаж, 2006 он буюу 10 жилийн өмнө л бие нь муудсан учир удирдлагын жолоогоо өөрийн төрсөн дүү Рауль Кастрод шилжүүлж байсан түүхтэй. Фидель Кастро нас барснаар Кубын гадаад бодлогод ямар нэгэн өөрчлөлт орохгүй гэж улс төр судлаачид дүгнэж байна.
Ц.ХИШГЭЭ