Эхний 7 өрөгт нь дараалан тэнцэж, 8 дахь өрөгтөө дэлхийн аварга Магнус Карлсоны хүнд довтолгоог няцааж, улмаар ялалт байгуулж, тэмцээнийг хошуучилж эхэлсэн Карякин 10 дахь өрөгтөө хожигдсоноор оноо тэнцсэн. Тэдний 11 дэх өрөг ч хайнцаж онооны харьцаа 5,5:5,5 болсон. Сүүлийн тоглолтод хэн хожсон нь аварга болох ч, тийм зүйл болохгүй гэж мэргэжилтнүүд үзжээ.
Карякин цагаанаар нүүх ч, Карлсон алдаа гаргахгүй. Тиймээс хоёр шатарчны хооронд нэмэлт тоглолт үүсэх нь тодорхой болж байна гэж дэлхийн шатрын домогт аварга Гарри Каспаров америкийн сэтгүүлчийн асуултад хариулжээ.
Оноо тэнцсэн тохиолдолд, аваргыг хэрхэн тодруулах вэ? гэсэн асуултад, -Нэмэлт тоглолт хийнэ. Гэхдээ энэ нь түргэн нүүлтийн цуврал тоглолт байх болно. Тэгээд, хэн нэг нь давамгайлж чадахгүй бол, блиц нүүх юм байна. Цагаанаар нүүх нь 5 минут, хараар нүүх нь 4 минутын эрхтэй. Гэхдээ цагаан нь заавал хожих болзолтой юм байна. Хэрвээ үндсэн тоглолт 6:6 оноогоор тэнцвэл, Норвегийн шатарчин аваргаа хамгаалах илүү шаанстай гэж судлаачид нэгэн дуугаар хэлж байна. Учир нь Карлсон бол түргэн болон блицын аварга.
Э.ЛХАГВАСҮРЭН
