Төв аймгийн Нэгдсэн эмнэлгийн дарга С.Оюунцэцэгтэй ярилцлаа.
Танайх “Шинэчлэгдсэн эмнэлэг-шинэлэг үйлчилгээ” аян хэрэгжүүлсэн гэсэн. Энэталаар яриагаа эхэлье?
-Аймгийн Засаг даргын санаачилгаар Төв аймгийн Нэгдсэн эмнэлэг 2016 онд “Шинэчлэгдсэн эмнэлэг-шинэлэг үйлчилгээ” аяныг зохион байгуулсан. Аяны хүрээнд эмнэлгийн багаж, тоног төхөөрөмжийн шинэчлэл, эмч, мэргэжилтнүүдийн мэдлэг, чадавхийг дээшлүүлэх, эмнэлгийн орчин, үйлчлүүлэгчдийн тав тухтай орчныг бүрдүүлэх гэсэн ажлыг хийсэн байгаа.
“Шинэчлэгдсэн эмнэлэг-шинэлэг үйлчилгээ” төслийн хүрээнд 875 сая төгрөгийн хөрөнгө оруулалтыг хийсэн. Дэлхийн зөн олон улсын байгууллага, Эрүүл мэндийн яам, “Эрүүл мэнд, салбарын хөгжил хөтөлбөр 5” төслийн хандив, тусламжаар энэ санхүүжилт бүрдсэн. Манай нэгдсэн эмнэлэг, амбулаторитойгоо зайтай болохоор өвчтөн нааш цаашаа явах, сувилагч нар ажил, үйлчилгээгээ явуулахад хүндрэлтэй байсныг энэ онд Солонгосын “Самсунг” корпорацийн “GCS” компанийн тусламжаар хүзүүвчийг барьж өгсөн. Энэ хүзүүвчийг 729 сая төгрөгөөр барьж ашиглалтад оруулсан байгаа. Үүний 288 сая төгрөг шийдэгдээгүй байсныг ирэх онд өгөхөөр болсон таатай мэдээлэл байна.
Оношлогооны дурангийн аппараттай болсон гэсэн. Энэ талаар?
-Манай нэгдсэн эмнэлэг Улаанбаатар хоттой ойрхон болохоор оношлогооны багаж бэрхшээлтэй байсан. Засаг дарга маань үүнд анхаарч 239 сая төгрөгөөр уян дурангийн асуудлыг шийдвэрлэсэн байгаа. Энэ нь ходоод дурандахад зориулагдсан, сүүлийн үеийн өвдөлтгүй арга хэрэглэдэг. Дурангийн эмчээ бэлдчихсэн. Тоног төхөөрөмжийн хувьд дуран нь ирчихсэн. Харин угаах болон хатаагч машин нь ирээгүй байна. Энэ хоёр нь ирчихвэл дурангийн оношлогоогоо хийх боломжтой. Мөн цусны төвд 436 сая төгрөгийн тоног төхөөрөмжийг нийлүүлсэн байна.
Танайд эмч, мэргэжилтнүүд хэр хүрэлцээтэй байдаг вэ?
-Манай эмнэлэг 278 орон тоотойгоор ажилладаг ч өнөөдрийн байдлаар 326 ажилтантай. Энэ хүндрэл бэрхшээлтэй байдлыг төсөвт суулгаад нэгэнт стандартаараа 326 хүн ажиллаж байгаа учраас цалинг нь шийдүүлэхээр хоёр жил явсан ч 278 орон тоогоор төсөв нь ирдэг. Ямар ч гэсэн үүндээ багтаагаад ажил, үйлчилгээгээ явуулж байгаа. Өнгөрсөн онд манайд магадлан итгэмжлэл хийсэн. Үүнд манай эмч, ажилчид идэвхтэй ажилласнаар дөрвөн жилийн хугацаатайгаар магадлан итгэмжлэлээ сунгуулан амжилттайгаар ажилласан.
Цахим үйлчилгээ хэрэгжүүлсэн нь иргэдийг бага ч гэсэн бухимдлаас гаргасан байх?
-Цахим үйлчилгээг өмнө нь нэвтрүүлсэн байсан. Гэхдээ үйлчлүүлэгчдийг чирэгдэлгүй үйлчлүүлэх талаас одоо ч гэсэн янз бүрийн ажил хийх шаардлагатай байгаа. Тухайлбал, сумдаас ирсэн иргэд дугаарлаж номероо авдаг. Гэтэл зарим нь хоёр биш нэг кабинетаар үйлчилдэг газар нь нэлээд ачаалал ихтэй байдаг. Гэсэн ч Засаг дарга, Эрүүл мэндийн газрын дарга нартай ярилцаж ирэх оноос арай өөр хэлбэрээр ажлын тав хоногийн гурван өдөр нь аймгийн төвийн иргэдэд, үлдсэн хоёр өдрийг сумдын иргэдэд үйлчлэх, тэднээс захиалга авах зэргээр журам боловсруулж шинэлэг үйлчилье гэсэн бодолтой байгаа. Манай аймаг бусад аймгийг бодвол олон сумтай. 27 сумын хамгийн ойрхон нь 13 км, хамгийн хол нь 300-гаад км-т яаралтай тусламж үзүүлдэг. Ялангуяа, сумдад эхчүүдийг төрүүлдэггүй, хоёрдугаар шатлалын эмнэлэгт төрүүлнэ гэснээс аймгийн нэгдсэн эмнэлгийн төрөх тасгийн ачаалал их. Заримдаа хүн хэвтэх газар байдаггүй. Тиймээс 50 ортой төрөх эмнэлгийг хурдан ашиглалтад оруулах хэрэгтэй байна.
50 ортой төрөх эмнэлгийн ажил юун дээр гацаад байна вэ?
-2-3 жилийн өмнөөс 50 ортой төрөх эмнэлэг шинээр барина гэж ярьсан боловч төсөв, санхүүгийн хувьд бэрхшээлтэй. Үндсэн чиглэлдээ 2016-2020 онд гэж тусгагдсан боловч улс орон даяар эдийн засаг хямралтай байгаа учраас Засаг даргын 2017 оны үндсэн чиглэлд тусгагдаагүй. Ирэх онд эдийн засаг гайгүй хямралаас гарвал 2018 оноос энэ ажил дэмжигдэх байх гэж бодож байна.
Өнөөдрийн байдлаар Төв аймагт ямар өвчин их гарч байна?
-Хүйтний улирал эхэлсэнтэй холбогдуулан хүүхдийн ханиад, хатгаа их хүндэрч ирж байна. Хүүхдийн тасаг маань ч гэсэн цөөхөн ортой. Боломжтой бол хүүхдийн эмнэлэг барих шаардлагатай. Хуучин эмнэлгийг хоёр жилийн өмнө аж ахуйн нэгж, байгууллагуудаас авсан хандив тусламжтайгаар засч янзалсан. Энэ жилийн хувьд шинэлэг нэг зүйл нь тоног төхөөрөмжийн мэргэжилтэн, техникч хоёр маань бүх зөөврийн хүчилтөрөгчийг нэгдсэн эмнэлгээсээ урагш нь татаад хүүхдийн тасаг руугаа оруулсан. Ер нь дотор, бөөр, элэг, цөс, сүрьеэ, арьс, БЗДХ нэмэгдэж байна.
Эмч, мэргэжилтнүүдийнхээ мэдлэг чадварыг яаж дээшлүүлж байна вэ?
-Манайх Хятадын Жилинин, Японы Тоттари, Солонгосын Кан Ван, ОХУ-ын Приморийн хязгаар гэсэн 10-аад газартай хамтын ажиллагаатай. “Шинэчлэгдсэн эмнэлэг-шинэлэг үйлчилгээ” аяны хүрээнд Хятадын Жилинин муж 100 сая юанийн хавтан хандивласныг эмнэлгийнхээ гадна талбайг тохижуулсан. Мөн дулаан эрчим хүчний газар гаднах усан оргилуурыг өөрийн хөрөнгөөр барьж өгсөн байгаа. Японы Тоттари мужид эх барих, эмэгтэйчүүд, мэдрэл, эхо, сүүлийн үед шүдний эмчийг бэлтгэдэг. Зүрхний гажигтай хүүхдүүдийг Солонгост мэс засалд оруулдаг. Мөн ОХУ-д богино, урт хугацааны сургалтад гэмтлийн эмч нарыг хамруулсан. Цаашид гадаад харилцаагаа сайжруулж өндөр хөгжилтэй орнуудад эмч, мэргэжилтнүүдээ дадлагажуулж, сургах зорилготой байгаа.
Дурангийн мэс заслыг аймагтаа хийдэг болсон гэсэн. Энэ талаар...?
-Аймгийн нэгдсэн эмнэлэгт анх удаа эмэгтэйчүүд болон ерөнхий мэс заслын дурангийн мэс заслыг хийсэн. Энэ мэс заслыг эмэгтэйчүүдийн тасгийн эрхлэгч Д.Өлзийбаяр эмч сайн хийж байгаа. Манай мэс заслын эмч Н.Биханзрагчаа дурангийн мэс заслыг анх удаа нэвтрүүлсэн гэдгээрээ Ерөнхийлөгчийн нэрэмжит шагналыг энэ жил авсан. Мөн гэмтлийн эмч Ц.Жамъянгарав, Г.Гантулга нар ясны хугарал, түгжээст хадаас мэс заслыг нэвтрүүлж 20-оод хүнд амжилттай хийсэн. Тиймээс энэ эмч нартаа цаашдынх нь ажилд амжилт хүсье.
Эх сурвалж : Зууны мэдээ сонин