Өмнөд Солонгосын Ерөнхийлөгч Пак Гын Хэг огцруулах тухай парламентын шийдвэрийг тус улсын Үндсэн хуулийн цэцийн шүүгчид хэвээр үлдээснээс хоёр хоногийн дараа буюу орон нутгийн цагаар өчигдөр оройны 19:00 цагт тэрбээр Хөх ордныг орхин явж өмнө нь амьдарч байсан гэртээ очжээ.
Хатагтай Пак Сөүл хотын өмнөд хэсэгт байдаг гэртээ ирэхэд дэмжигчид нь халуун дотноор хүлээн авсан байна. Дотны найз Чой Сүн Сил нь нэр холбогдсон авлигын дуулиан шуугианд холбоотой гэх үндэслэлээр түүнийг ерөнхийлөгчөөс огцруулсан юм. Өнгөрсөн долоо хоногийн баасан гарагт шүүхийн шийдвэр гарснаас хойш Пак хэлэхдээ “Цаг хугацааны явцад үнэн зүйл ил болно гэдэгт би итгэж байна, үнэнийг олж тогтоох болно” гэжээ. Мөн тэрээр “Ерөнхийлөгчийн алба хаших үүрэгт хугацаагаа дуусгаж чадаагүйд уучлаарай, намайг дэмжсэн дэмжигчиддээ баярлалаа” хэмээн уучлалт хүссэн байна.
Одоо Пак Гын Хэгийн халдашгүй дархан эрх дуусгавар болсон бөгөөд улс төрийн дэмжлэг үзүүлснийхээ хариуд компаниудаас мөнгө татах боломжийг Чой овогт эмэгтэйд олгож байснаа хүлээн зөвшөөрвөл Пакт эрүүгийн хэрэг үүсгэж магадгүй юм.
Ц.ХИШГЭЭ