29-ний үүрээр Хойд Солонгос богино зайн тусгалтай баллистик пуужин байж болзошгүй нисдэг биетийг туршин хөөргөсөн гэж Өмнөд Солонгосын арми өнөөдөр мэдэгджээ. Америкийн армийн Номхон далайн бүсийн командлалын төв тэрхүү пуужинг Япон тэнгист унасныг нотолсон байна.
Ёнхап агентлаг Өмнөд Солонгосын армийн нэгдсэн штабын мэдэгдлээс эш татаж мэдээлснээр, орон нутгийн цагаар 5 цаг 39 минутын үед Хойд Солонгос Канвон мужийн Вонсаны бүсээс нэгэн нисдэг биет хөөргөсөн ба тус нисдэг биет 450 км орчим нисжээ. Үүнийг "Scud" пуужин байж болзошгүй хэмээн таамаглаж байна. Өмнөд Солонгос, Америкийн арми бодит мэдээллийг цаашид судалж, Өмнөд Солонгосын арми Хойд Солонгосын байдлыг нягт хянах болно гэсэн байна.
Өмнөд Солонгосын засгийн газар мөн өдрийн өглөө аюулгүй байдлын шуурхай хурал хийсэн байна.
Америкийн армийн Номхон далайн бүсийн командлалын төвийн гаргасан мэдэгдэлд, тус командлалын төв Хавайн орон нутгийн цагаар 28-ний 10 цаг 40 минутад Хойд Солонгос богино зайн баллистик пуужин туршин хөөргөснийг тандаж мэдлээ. Пуужинг Хойд Солонгосын зүүн далайн эрэг дэх Вонсаны орчмоос хөөргөсөн байна. Пуужин 6 минут ниссэний дараа Япон тэнгист унасныг илрүүлсэн гэж тэмдэглэжээ. Одоогийн байдлаар Хойд Солонгосын тал энэ тухай ямар нэг байр суурь илэрхийлээгүй байна.
Эх сурвалж : Mongol.cri.cn
