Өчигдөр Нийгмийн бодлого боловсрол соёл шинжлэх ухааны байнгын хороогоор нийгмийн даатгалын ерөнхий хуулийн шинэчилсэн найруулгыг хэлэлцсэн. Тус хуулийн төсөлд тэтгэврийн насыг бууруулах болон иргэд өөрсдийн сонголтын үндсэн дээр тэтгэвэрт гарах боломжийг тусгасан байна. Тодруулбал улсад 30-35 жил ажилласан бол шууд тэтгэвэрт гарах боломжийг нээн өгч байна.
Харин засгийн газрын загасны ой санамжийг УИХ-ын гишүүн Чинзориг шүүмжлэв. Уншигч та бүхэн санаж байгаа бол одоогоос 3 сарын өмнө Засгийн газар ОУ-ын валютын сангийн шаардлагын дагуу тэтгэвэрт гарах насыг 65 болгон нэмэх тухай зарлаж нийгэмд талцал маргаан үүсгэж байсан. Гэтэл одоо эдийн засаг дээрдсэн гэдэг үгээр ам таглаж, тэтгэврийн насыг бууруулах тухай ярьж байна. УИХ-д орж ирсэн хуулийн төслөөр бол жишээ нь : 20 настайгаасаа улсад 30 жил ажилласан хүн 50 насандаа тэтгэвэрт гарч болох ажээ. Товчоор бол одоо ЗГ ард иргэдийнхээ үгийг сонсч, гаргасан шийдвэрээсээ буцаж, тэтгэврийн насыг бууруулахаар болж байна.
Нийгмийн даатгалын ерөнхий хуулинд тэтгэврийн насыг бууруулах талаар нэг ч үг байхгүй юм байна. Харин ЗГХЭГ-ын дарга Мөнхбат энэ хуулийг эхлээд хэлэлцээд хойноос нь харьяа яам нь тэтгэврийн хууль хөдөлмөрийн хуулийг оруулж ирнэ гэж ярьж байна. Өөрөөр хэлбэл эрх баригч Ардын нам дахин сонгуулийн санал хураалтын босгон дээр ард иргэдэд таалагдах шийдвэрийг эхнээсээ гаргаж байгаа нь энэ бололтой. Тэтгэврийн насыг нэмнэ, бууруулна гэж хэдэн удаа ард иргэдээрээ наадах юм бол. Тэтгэврийн насыг бууруулах нь нэг талаар иргэдэд ээлтэй шийдвэр боловч манай нийгмийн даатгалын сан энэ ачааллыг одоо даахгүй гэдгийг хэдхэн сарын өмнө эрх баригч намын гишүүд ярьж байсан санагдана.
О.БЯМБАА