Олон улсын жудо бөхийн холбооноос зохион байгуулж буй дэлхийн чансааны оноо олгох Хөх хотын Гранпри тэмцээний эхний өдрийн барилдаанууд явагдаж өндөрлөлөө. Энэ өдөр эрэгтэйчүүдийн 60,60 кг, эмэгтэйчүүдийн 48, 52, 57 кг-ийн жингийн барилдаанууд явагдсан юм.
Эрэгтэйчүүдийн 60 кг-д “А” хэсгийг тэргүүлэн барилдсан МУГТ Д.Амартүвшин хагас шигшээ барилдаанд Оросын Роберт Мшидобазег ялж шигшээд шалгараад Японы Шишимэд хожигдож хүрэл медаль хүртлээ. Тэрээр БНХАУ-ын гранприд гуравдах удаагаа шигшээд шалгарч буй нь энэ юм. Энэ жинд хүч үзсэн Дэлхийн аварга Г.Болдбаатар Роберт Мшидобазед хожигдож дагах тойрогт орж Чехийн Патриков, Оросын Огузов нарыг ялж хүрэл медаль хүртсэн байна.
66 кг-ын жинд хүч үзсэн Ё.Басхүү энэ өдөр шилдэг барилдаан үзүүлж хүрэл медалийн төлөө Японы Такожог цэвэр ялсан юм. Харин Азийн аварга Д.Алтансүх медалийн төлөөх хариуцлагатай барилдаанд Японы Хашигучид ялагдаж тавдугаарт орсон.
Мөн эмэгтэйчүүдийн 52 кг-д жин өгсөж хүч үзсэн МУГТ М.Уранцэцэг хагас шигшээ барилдаанд Канадын тамирчин Гуйкад хожигдож хүрэл медалийн төлөө БНХАУ-ын Уан Жи Ёог өчих мэхээр цэвэр хожсон юм. Энэ жинд хүч үзсэн Ч.Аззаяа хэсгийн аварга болсон ч Ардчилсан Солонгосын Рим, БНХАУ-ын Ши Уан нарт хожигдож тавдугаар байр эзэллээ.
Эмэгтэйчүүдийн 57 кг хүч үзсэн МУГТ Д.Сумьяа шигшээ барилдаанд Момо Томаокид нэмэлт цагт торгуулиар хожигдож мөнгөн медалийн эзэн болсон юм. Тэмцээн маргааш эрэгтэйчүүдийн 73, 81, 90кг, эмэгтэйчүүдийн 63, -70кг-ын жингийн барилдаануудаар үргэлжилнэ.
О.ДАШНЯМ
