Энгийн нэг өдөр. Иргэн Б бага насны хүү, охин хоёроо эрүүл агаарт тоглуулья, эхнэрээ гарынхаа хоолоор дайлая гэж эртлэн зуслангаа зорьсон. Бугуйн цагаа харвал 14.00 цаг өнгөрч байсан гэдэг. Зуслан явах бодолтой байсан кадастрын албаны хоёр залуу ч түүний Тоёото кроун машинд дайгджээ. Тэд нар нь хойд талын суудалд хүүхдүүдтэй нь хамт тухлав. Хотоос гаран хойд зуслангийн зам руу ороход унаа тэрэг сэлүүхэн, хэд хоногийн өмнө орсон борооноор байгаль сэргэсэн нь сэтгэл татам. Түүнийг дагаад машинд хөгжилтэй яриа өрнөж байв. Хөдөлгөөн намуухан. Урдаас ирж буй машин тэрэг эгнээндээ, ямар ч айж түгших зүйлгүй урагшилж байв. Угтаж ирэх машинтай ойртох зуур нэг жийп эгнээнээсээ гэнэт гарч, сөрөг урсгалд орон далайн давалгаанд шидэгдэх завь мэт гуйвж, дайваж эхлэх нь тэр. Тэгсэн хэрнээ хурдаа огт саах шинжгүй нь түгшүүр төрүүлэв. Тэгтэл урсгал сөрөн хурдлах тэр жийп юу юугүй өөдөөс нь тулж ирэх нь тэр. Зүүн тийшээ залбал урсгал сөрөхөөс гадна, уул тулна, баруун тийшээ дарвал доошоо жалга руу унах аюултай учир хурдаа сааж, замаас гарч, төмөр хашлагыг налах аядан зогсохыг хичээв. Гэтэл нөгөөх 470 юу юугүй ирээд эхнэрийнх сууж явсан зүүн талаас нь хар эрчээрээ мөргөчих нь тэр. Хүчтэй мөргөсний улмаас 470 жийп онхолдон дээшээ харжээ. Харин кроун машины өмнө сууж явсан иргэн Б-ийн эхнэр машины дотогшоо цөмөрч хонхойсон төмөрт хавчуулагдсан, хойно сууж кадастрын албаны залуугийн тархи, толгойноос нь цус садарсан, хүү нь бэртсэн, өөрөө зөөлөн эдийн бэртэл авсан байна. Аз болоход охин нь, ард суусан нэг залуугийн хамт гэмтэл бэртэл авалгүй гарчээ. Өөрөө чүү чамай машинаасаа гарсан ч, эхнэрийг нь машины хонхойсон эд анги дарсан учир салгаж хүчрэхгүйд хүрэв. Нөгөө машин, бусдыг анхаарах сэхээ ч байсангүй. 103-ыг л хамгийн түрүүнд, дараа нь Онцгойг дуудав. Хариу нь "Ар гүнт бол Төв аймгийн харьяаллын газар нутаг. Тийшээ ярь гэсэн хариу сонсов. Төв аймгийн түргэнтэй ярихад - Аймагт хамаагүй тул нутаг дэвсгэрээр нь хамаарах Партизан баг руу ярь гээд утсаа тасалжээ. Ингээд Партизан руу ярьж түргэн дуудав. Осол 15 цагийн орчимд болсон хэдий ч Партизаны түргэний тэрэг бүтэн 3 цагийн дараа хүрэлцэн иржээ. Носилка, энэ тэр, яаралтай тусламж үзүүлэх багаж хэрэгсэл үнэхээр дутмаг байсан гэж газар дээрх гэрч өгүүлж байна. Ганц л тариа хийсэн нь түргэний гурван цаг хүлээлгэсэн тусламж байсан байна. Харин түргэнийг ирэх гэсээр байтал тархи, толгойдоо гэмтэл авсан, Кадастрын албанд ажилладаг залуу амьсгал хураажээ. Бүтэн 3 цаг гаран цус алдсан тэр залууг харсан хөгшчүүл -Цус алдаад амь насаа алдлаа шүү дээ гэж халаглаж байсныг гэрч мөн өгүүлнэ. Эмэгтэй машиндаа хавчуулаастай мөн л 3 цаг гаран тарчилжээ. Дуудлага өгснөөс хойш 4 цагийн дараа л Онцгойгын баг бүрэлдэхүүн ирсэн ч , мөн л гар нүцгэн. Энэ бол онгоцоор бол Бээжин орчоод ирчих хангалттай урт хугацаа. Хөшчих лоом ч үгүй, цавчих сүх ч үгүй, таслах хөрөө ч үгүй гар мухар ирээд, ард иргэдээс дэмжлэг хүссэн байна. Өмнө нь ч тэгэж л байсан дуулддаг. Мөн л иргэд санаачилгаараа хөдөлж, мөргүүлсэн машины урд, хойноос нь хоёр машин татаж чангаасаар эмэгтэйг хавчигдсан төмрөөс нь салгасан байна. Гэтэл осолд орсон эмэгтэйг машинаас татаж гаргах ажлыг ч Онцгойгынхон хийхээс болгоомжилжээ. Ийм л нэг Онцгойтой, ийм л нэг түргэнтэй юм уу, эсвэл таарсан нь тэр юм уу чөтгөр бүү мэд.
Мөргөсөн согтуу залуугийн машин аль хэдийн шатаж дууссан байна. Онхолдсон машинаас гарч ирсэн залуу шал согтуу байсан учир мөлхөж гарч ирэнгүүтээ зүлгэн дээр дээш харан хурхирчээ. Харин түүний дараахан хүмүүс шуугиад байсан чинь, нөгөө онхолдсон машины цонхоор нь 3 настай бяцхан охин өөрөө мөлхөөд гараад ирэх нь тэр. Согтуу аавын охиноо орхисноо ч мэдэх ухаан мэдрэл тасарсан нь тэр.
Бараг л архи нь гарсан хойно автынхан ирсэн гэх үлгэр шиг юм урсаж байна. Эмэгтэйг машинаас салгасны дараа Гэмтэлийн эмнэлэг рүү аваад явах гэтэл мөн л асуудал. Дүүргийн эмнэлэг, аймгийн эмнэлэгт аваачих ёстой гэсэн асуудал ургасан байна. Автын цагдаа нар ч ослын газар мөн хожуу очсон тухай тэнд байсан иргэд хэлж байна. Дуудлага өгөөд ч ирэхээ больж дээ, Онцгой, Түргэн... Ар гүнтийн энэхүү ослоос болж эмнэлгийн анхан шатны тусламж авч чадалгүйгээр 40 настай нэгэн сайхан залуу амиа алдлаа. 5 настай бяцхан хүү хэвлийн хагалгаанд оров. Хүүгийн ээжийн чөмөг, хавирга гээд хугарал ихтэй эмнэлэгт эмчлүүлж байна. Эр нөхөр нь битүү гэмтэл, зөөлөн эд анги нь бэртжээ.
Ийм л нэг аюул Монголын нэгэн сайхан гэр бүлийг нөмөрлөө. Энэ бүхний хэрэгтэн нь ердөө сархад хэтрүүлэн уусан, том тэрэг унан даналзсан согтуу залуу. Энэ бүхнийг өгүүлэхийн учир нь, Монголд амьд явахад, амьд явахын тулд эмчилгээ үйлчилгээ авах Үндсэн хуулиар олгогдсон эрхээ эдлэхэд бэрх болжээ. Автын ослоор өдөр бүр 2 сайхан иргэнээ Монгол улс алдаж буй байна гэж ярих биш, түүнийг таслан зогсоох ажлыг Монголын Төр хийх цаг болжээ. Иргэдээ ээлтэй төр гэдгээ ярих, тунхаглах биш, харуулах цаг болжээ. Хамгийн үнэтэй зүйл бол хүний халуун амь. Энэ амийг тэгээд хэнээс нэхэх вэ? Хотын дарга Су.Батболдоос уу?, эс бөгөөс Онцгойг хариуцдаг Хүрэлсүхээс үү?, үгүй бол ерөнхий сайд Эрдэнэбатаас уу? Монголын төр иргэнээсээ татвар, хураамж авахдаа гаргуун бас чадмаг. Маш хүчирхэг сүлжээтэй. Түүн шигээ л ажилла даа. Иргэн чинь амь нас нь хутганы ирэн дээр тулчихаад тусламж эрэн утасдаж байхад гараа сунгаж сур л даа. Авдаг шигээ, иргэдээ халамжилж чаддаг болооч, Үндсэн хуулиа мөрддөг болооч гэж хэлье.
Ц.ЭНХБАТ