.jpg)
Өртэй хүн өөдөлдөггүй. Энэ утгаар нь үзвэл Монголын бүх хүн, тэр дундаа Монгол улсын ерөнхийлөгч ч өртэй. Тэр ерөнхийлөгчийн сонгуульд нэр дэвшихдээ "өр тавьсан" байна. Тиймээс өрөө нимгэлэхийн тулд өөрийгөө дэмжсэн, сурталчилгааны багт нь ажилласан, санхүүгийн дэмжлэг үзүүлсэн, компанит ажлыг нь амжилттай зохион байгуулсан хүмүүсдээ хариу барьж эхэлжээ.
Түүний сонгуулийн штабад л ажилласан хүмүүс ерөнхийлөгчийн тамгын газарт орон тооны болон орон тооны бус ажилд томилогдох хүрээлэлд багтсаныг олон нийт ажиглаж сууна. Энэ бол Баттулга ерөнхийлөгчийн өнөөдөр хийж чадаж буй зүйл. Гэхдээ түүнийг ард түмэн дэмжээгүй бол тэр Монгол улсын ерөнхийлөгчөөр сонгогдож чадахгүй байсан. Ард иргэддээ; Оффшорын мөнгийг эх орондоо оруулж ирнэ, оффшорчидтой хатуу тэмцэнэ, олигархи бүлгийн хууль бус аргаар олсон өмч хөрөнгийг нь улсдаа эргүүлэн авна, Монголын баялгийг цөлмөгч З0 гэр бүлтэй эвлэрэхгүй тэмцэнэ, ард иргэдээ сайхан амьдруулна гэж гэж хэлсэн. Ингэж хэлж тэр иргэдийн дэмжлэг авч сонгогдсон. Энэ бол ард иргэддээ тавьсан Баттулга ерөнхийлөгчийн өр. Харин энэ өрөө хэзээ төлж эхлэх бол гэдгийг Монголын иргэд Баттулгаас хүлээж байна. Баттулгын эхний алхмыг нь ажиглахад, монголын улс төрчдийн нийтлэг алдааг давтаж эхэллээ. Энэ бол сонгуулийн үеэр өөрийн багт ажилласан хүмүүсээ янз бүрийн шатны албан тушаалд "шагналын зарчмаар" томилдог томилгоо юм. Шагналын томилгоо улс орны хөгжилд юу авчирсныг тайлбарлах шаардлага алга.
Ц.ЭНХБАТ
