.JPG)
-Эдийн засаг, эдийн засаг, эдийн засаг гэж хэлж гарч ирээд, улс орны эдийн засгийг элгээр нь хэвтүүлсэн Ч.Сайханбилэгээс өгсүүлээд олон ерөнхий сайдын нүүрийг үзлээ. Хийхээсээ илүү хэлбэрдэх, бүтээхээсээ илүү ярьдаг Ц.Элбэгдоржийн үеийг ч тууллаа. Бүтээн байгуулагч ерөнхий сайд нэр зүүсэн Н.Энхбаярын он жилийг ч санаж байна. Монгол улсын хөгжлийн жолоог атгасан 15 ерөнхий сайдтай сүүлийн 25 жилд учирлаа. Ерөнхий сайдын буюу, Монгол улсын Засгийн газрын дундаж наслалт ердөө л 1 жил 3 сар ажээ. Монголын төр, засгийг тогтворгүй гэж нэрлэдэг нь энэ үзүүлэлттэй холбоотой ажээ.
Тогтвортой ажилласан хоёрхон ерөнхий сайд байдаг. Түүхэндээ, П.Жасрай, Н.Энхбаяр нар ерөнхий сайдаар ажиллаж байхдаа бүрэн эрхийнхээ хугацааг дүүргэсэн гэдэг. Тэгвэл өнөөдөр Ж.Эрдэнэбат ерөнхий сайдын тэргүүлсэн Монгол Улсын Засгийн Газар ээлжит огцрох босгон дээр тулж иржээ. 2016 оны сонгуулиар МАН УИХ-д үнэмлэхүй олонхи болоход М.Энхболдыг ерөнхий сайдаар томилогдоно гэдэгт бүгд итгэж байсан. Гэвч тэрбээр улс төрийн өөр нүүдэл хийсэн. Өөрөө ерөнхийлөгчөөр сонгогдох замыг сонгож, ерөнхий сайдаар хэний ч санаанд ороогүй Ж.Эрдэнэбатыг томилуулж дөнгөсөн. Түүний кабинетийг ч намын дарга М.Энхболд өөрөө бүрдүүлж өгсөн гэдэг. Энэ бүгдээс л өнөөгийн улс төрийн задрал эх авсан гэж улс төр судлаачид дүгнэж байна. Ерөнхий сайд Ж.Эрдэнэбатыг намын дарга М.Энхболдын "халаасны хүн" гэж нэрлэдэг ч, улс орны хөгжлийг эргээд харахад, хамгийн зөв хүн Засгийн тэргүүнээр ажиллажээ гэж бодогдоно.
Тэр маш хэцүү, ээдрээтэй, удирдах, удирдуулах ёсоо гээсэн гэсэн шүүмжлэл сонссон Засгийг удирдсан. Тэрбээр эрээвэр, хураавар сайд нараас бүрдсэн кабинетээ амжилтанд хүргэсэн. Энэ амжилтыг нь эдийн засгийн өсөлтийг харуулж буй тоон үзүүлэлтүүд илэрхийлдэг. Ж.Эрдэнэбат Монголын түүхэн дэх шилдэг ерөнхий сайдын нэгээр тэмдэглэгдэн үлдэнэ. Одоо харин энэхүү шилдэг, чамбай ерөнхий сайдын түүний залгамжлагч хэн байх вэ? гэдэг асуудал сонирхол татаж байна. Дараачийн Засгийн газар хэр тогтвортой ажиллахыг хэн ч хэлж мэдэхгүй байна.
Хэрвээ намын дарга М.Энхболд ерөнхий сайдаар томилогдсон бол нам нь ч хуваагдаж, засаг нь ч огцрохдоо хүрэхгүй байсан гэж улс төр судлаачид нэг дугаар дүгнэж байна. Ийм нэгэн Монголын улс төр...
Ц.ЭНХБАТ
