Ахуйн хэрэглээнд зориулан худалдаанд гаргаж байгаа бага хэмжээгээр савласан газыг иргэд өргөнөөр авч хэрэглэдэг. Гэвч өсвөр насны хүүхдүүд буруу хэрэглэн мансуурах явдал газар авчээ. Энэ тал дээр хяналт сул байгаа гэхэд нэг их дэгсдэхгүй л болов уу.
Түүгээр ч зогсохгүй амь насаа алдаж байгаа хүүхдийн тоо жил ирэх бүр нэмэгдэж байгаа гэсэн статистик тоо мэдээ байна. Тухайлбал энэ сарын 4-5-нд шилжих шөнө хоёр ч хүүхэд харамсалтайгаар амиа алджээ. "СХД-ийн 19-р хороонд амьдрах 14 настай эрэгтэй хүүхэд татаж унаад нас барсан байна" гэсэн мэдээллийн дагуу цагдаагийн байгууллага шалгахад ахуйн хэрэглээний газ үнэртэж байгаад хордож нас барсан байна. Үүнээс гадна БЗД-т амьдардаг 13 настай хүү мөн л газ үнэртэж амиа алдсан байна. Дээрх хүүхдүүдийн ар гэр ахуйн газыг өргөн хэрэглэдэг байсан бөгөөд ээж аавын хяналт сулаас болж хүүхэд буруугаар ашиглаж байсан нь тогтоогджээ.
Ийм төрлийн гэмт хэрэг ар араасаа шил дараалан гарч байгаа энэ үед эцэг эхчүүд өсвөр насны хүүхдэдээ анхаарал тавих, нөгөөтэйгүүр ийм төрлийн гэмт хэрэгт хууль хяналтын байгууллага анхаарлаа хандуулах шаадлага зүй ёсоор гарч байна.
Ч.БЯМБАА
