Европын толгой улсын нэг болох Германы эмч нарын сарын дундаж цалин 10 мянган евро. Дөнгөж ажилд орж буй эмчийн цалин 8 мянган евро. Монгол төгрөгөнд шилжүүлбэл, сардаа 24 саяас 30 сая төгрөгийн цалин авч байна гэсэн үг. Үүнийгээ ч Германы эмч нар голж, Норвеги, Швед, Швейцарь зэрэг улс руу өндөр цалинтай ажлыг зорьдог гэж Хатагтай эмнэлгийн үүсгэн байгуулагч, Герман улсад эмчийн мэргэжил эзэмшсэн Отгонболд эмч тодотгож байна.
Тэгвэл монгол эмчийн жилийн цалин нь хөгжилтэй орны эмчийн нэг сарын цалинтай ч ойртож очихгүй байгаа нь тун өрөвдөлтэй. Японд, бага ангийн багшийн сарын цалин мөн л 10 мянган ам.доллартай дүйдэг байна. Энэ бол сардаа 25 сая төгрөгийн цалин авч байна гэсэн үг.
Тэгвэл Монгол багшийн жилийн цалингийн нийлбэр нь ч япон багшийн нэг сарын цалинд ч дөхөж очихгүй байгаа нь гунигтай. Ийм л цалингаар эмч, багш нараа зүтгүүлж ирсэн, зүтгэ гэдэг төртэй байгаа нь гутамшиг. Гадаадаа орхиод Монголтойгоо зүйрлэе. Санхүүгийн зохицуулах хорооны дарга, УИХ-ын гишүүн Лүндээжанжангийн дүү гэх Баярсайханы сарын цалин 10 сая төгрөг. Үүнд эмч багш нарын жилийн цалин ч мөн л хүрэхгүй.
Монгол улсын ерөнхийлөгч Ц.Элбэгдорж санаачлан шүүх болох прокурорынхны цалинг хэд дахин нэмж болно, төсөв даадаг гэдгийг үлгэрлэснийг ч санахад илүүдэхгүй. Бусдад худалдагдахгүй, шударга ёсыг тогтоохын тулд гэдгээр шалтаглан шүүгчид болон прокурорынхны цалинг хэд дахин өсгөсөн. Тэдний сарын цалингийн дундаж нь 5-8 саяд хэлбэлздэг.
Энэ шударга, ариун явдал мөн үү? гэж асуух ёстой. Банкны зээлэнд системээрээ хүлэгдэж, ядуучуудын эгнээнд жилээс жилд гулсан шилжиж буй эмч, багш нарын цалингаа нэмүүлэхийн төлөө тэмцлийг эрүүл саруул хөдөлгөөн гэж харахаас өөр аргагүй. Улс хөгжихийн үндэс нь боловсролтой, мэдлэг чадвартай, дээр нь эрүүл саруул иргэн юм.
Тэгвэл энэ суурийг тавьдаг эмч, багш нартаа гар татдаг биш, гар сунгадаг төртэй больё. Би эмч, багш нарын цалингаа нэмүүлэх хөдөлгөөнийг дэмжиж байна.
Ц.ЭНХБАТ
