Монгол Улсад эрүүл, аюулгүй хүнс нийлүүлдэг гол нутаг Сэлэнгэ аймаг гэдгийг хүн бүр мэднэ. Улаанбуудайн төмс хүнсний ногооны дийлэнхийг тээвэрлэдэг 110 км-ийн урттай зам тус аймгийн Түшиг, Цагааннуур, Зүүнбүрэн, Шаамар сумын нутгийг дамнадаг. Гэвч энэ зам өнөөдөр их засварт оролгүй даруй 10 жил болжээ. Тус замыг 1983 оноос хойш огт их засвар хийгээгүй гэж тус замаар тээвэр хийдэг жолооч нар ярьж байсан юм. Тээвэр хийж байгаа жолооч нар хэлэхдээ 3-4 цаг явах боломжтой замаар хонон өнжин явж ялангуяа “Бороо цас ихтэй үед тээвэр хийхэд бэрхшээлтэй байдаг тухайгаа ч хэлж байлаа.
Тус замыг ухаж тэгшлэх бус шороо асган далан босгох учиртай. Аймаг, орон нутгаас жил бүрийн намар ургац хураах үеэр өнгөн хэсгээс нь хуссаар байгаад одоо газрын хөрснөөс доошоо 40 см хүртэл ухчихжээ. Сэлэнгэ аймгийн дөрвөн сумыг дамнасан 110 км замыг асфальтан зам болгох хүсэлт олон удаа гаргасан боловч шийдэлд өнөөг хүртэл хүрэхгүй байгааг аймгийн тус сумдын засаг дарга нар учирлаж байлаа.
Мэдээж улсын хэмжээнд хэрэглэх будаа, тарианы 30 хувийг тээвэрлэдэг гол зам учраас хөсөр хаяж чадахгүй байгаагаа Сэлэнгэ-АЗЗА” компанийн гүйцэтгэх захирал Л.Ганболд бидэнд хэлж байв.
УИХ-д нэр дэвшиж байгаа хүн болгон “Замтай болгоно” гэж амлаад л гардаг. Гэвч өнөөдөр нөхцөл байдал ийм л байна. Амлалтад итгэсэн иргэд, сонгогчид засмал замтай болно гэж хүлээсээр... эдийн засгийн болоод эд хөрөнгийн хэмнэлт гарна гэж хүлээсээр...
Харамсалтай нь ард түмнийг хоосон хошгируулсаар гурван удаагийн сонгууль буюу 10 жилийг ардаа үдсэн “Буянтай зам” одоог хүртэл шороон зам хэвээр байсаар...
Шинээр байгуулагдаж буй Засгийн газар хүнсний аюулгүй байдалд анхаарч байгаа бол, энэ замын асуудлыг анхаарч үзнэ гэж найдаж байна.
Ц.ХИШГЭЭ