Ийм үнэлгээг Оросын Засгийн газрын гишүүдийн зүгээс өгсөн байна. Энэ өдрүүдэд дөнгөж бүрэлдэж буй У.Хүрэлсүхийн тэргүүлэх Засгийн Газар ямар учраас ингэж дуудуулах болов оо ? Хоёр улсын Засгийн Газар хоорондын өргөтгөсөн бүрэлдэхүүнтэй хурлаас энэ сөрөг үнэлгээ гарсан байна. ОХУ-ын Иркутск хотноо өнгөрөгч Мягмар гарагт хийхээр төлөвлөсөн Засгийн Газар хоорондын уламжлалт уулзалтаа Монголын тал "тасалжээ". Оросын талаас хэлэлцээртэй холбогдох найман яамны сайд оролцсон 80 хүний бүрэлдэхүүнтэй Засгийн газрын төлөөлөл Москвагаас Иркутскийг зорьсон байна.
Гэтэл Монголын талаас ганц ч төлөөлөгч хэлэлцээрт үзэгдсэнгүй. Түүгээр ч зогсохгүй, очиж чадахгүй гэдэг мэдээллээ урьдчилан өгөөгүй нь шүүмжлэл дагуулж байна. Монголын зүгээс, - УИХ-аар сайд нарын томилгоог хэлэлцэх болсон тул очиж амжихгүй боллоо гэдэг мэдээллийг Оросын талд өгсөн гэж тайлбарлаж буй нь ч учир дутагдалтай ажээ. Энэ талаар, - Өнгөрсөн Баасан гарагийн 17.30-д энэ мэдээллийг Улаанбаатар хотод суугаа ОХУ-ын ЭСЯ-д ирүүлсэн. Ажил тарахаас 30'-хан минутын өмнө. Энэ бол мэргэжлийн бус ажиллагаа. Тун хариуцлагагүй үйлдэл. Бид мэдээллийг авангуутаа Засгийн Газартаа нэн даруй дуулгасан. Хэдэн сар жилийн өмнө нэгэнт тохирсон, бүх бэлтгэл ажлыг хангасан байсан тул зогсооход хожимдсон байсан. 80 хүний бүрэлдэхүүнтэй багийн тал орчим хувь нь аль хэдийнээ онгоцондоо суудлаа эзэлсэн байсан. Үлдсэнд нь ч дуулгахад хялбар байгаагүй. Монголоос ОХУ-д суугаа ЭСЯ ч мэдээлээр хангаж болох л байсан. Монголын Засгийн Газар бол үйл ажиллагааны уламжлал залгаасгүй, мэргэжлийн бус ажиллагаатай гэж ОХУ-ын мэргэжилтнүүд дүгнэсэн байна. Ийм нэгэн үнэлгээгээр У.Хүрэлсүхийн тэргүүлэх Засгийн Газар гараагаа эхэллээ.
Ц.ХИШИГЖАРГАЛ