Нийслэлийн прокурорын газар, Эрүүгийн цагдаагийн албаны Хар тамхитай тэмцэх газрын алба хаагчид хамтарсан шалгалт хийж хар тамхи, мансууруулах бодис хэрэглэсэн этгээдүүдийг үйлдэл дээр нь илрүүлэн баривчиллаа.
Өнгөрөгч шөнө явуулсан шалгалтаар хар тамхи, мансууруулах бодисыг тээвэрлэн улсын хилээр хууль бусаар нэвтрүүлсэн, хэрэглэсэн Э, Г, М нарыг үйлдэл дээр нь илрүүлсэн байна. Гэмт хэрэгт холбогдсон этгээдүүд нь 23-25 орчим насны, нэг эмэгтэй, хоёр эрэгтэй байжээ. Тэднийг Баянзүрх дүүргийн 11 дүгээр хорооны нутаг дэвсгэрээс саатуулсан бөгөөд бие болон гар тээшинд нь үзлэг хийхэд хар тамхи, мансууруулах төрлийн бодист орох ice буюу мөс илэрчээ. Мөн биед нь урьдчилсан байдлаар шинжилгээ хийхэд хар тамхи, мансууруулах бодис хэрэглэсэн болох нь тогтоогдсон байна. Одоогоор тус этгээдүүдэд эрүүгийн хэрэг үүсгэн, цагдан хорих таслан сэргийлэх арга хэмжээ авч, шалгалтын ажиллагааг үргэлжлүүлж байна.
Эх сурвалж : ЦЕГ
