Яаж би- Б.Хурц шиг “-Ярих уу! –Яах уу! –Айн!” Гэсэн гуравхан үгээр улс төрчдийг “өвдөг чичирүүлж”, өрөөнд ялаа ниссэн ч дуулдам “нам” болгох вэ!
Яаж би- Яг түүн шиг тагнуулчийн ажлыг амжиргаа залгуулах, албан тушаал авах “боловсон шантааж “ болгон бусдыг “дарамтлах” вэ!
Яаж би- Лу.Болд шиг түрүүлж дуугарч амаа хөлдөөнгүүтээ,алах заналхийллийн амьд гэрч болон дахин “бүдрэх”вэ!
Яаж би-Д.Эрдэнэбат шиг “Эр хүн гурван цохилт даах ёстой” гэж эрэлхэг баатрын дүрд тоглонгуутаа дотроо “Хурц гишүүн” гэж андууртлаа “бантах” вэ!
Яаж би-Авлигачид шиг огцорсон тагнуулчийн бараанаар “шээс алдаж”, сүрэг сүргээрээ сүүлээ хавчин “зугтаах”вэ!
Яаж би-Ч.Хүрэлбаатар шиг “Хотгор шанагын уурхай”-г зарсан баримтыг хоёр нүдээрээ харж байхад “мэлзсээр”Сангийн сайд болох вэ!
Яаж би- З.Энхболд шиг өөдөөс нь сөрж үг хэлсэн болгоныг “30 гэр бүлийн нэг”-ээр өргөмжлөн “тодруулах” вэ!
Яаж би-О.Баасанхүү шиг хадам аавынхаа зурсан зургийг “шахаа, шантааж” зэрэгцүүлэн гишүүдэд борлуулдаг "наймаачин" түшээ,халамжит хүргэн байх вэ!
Яаж би-Бэлэн мөнгө тараах нь эдийн засгаа яаж хорлодгийг бие дээрээ туршсан мөртлөө дахин 55 тэрбумаар “хорлон сүйтгэх”-ийг хүлээж “суух” вэ!
Яаж би-Манлайлагчид нь “Марзан Шарав”-аас ч давсан “ хошин шог ” ийм улсыг хөгжинө гэж итгэх вэ!
Яаж би-Солонгос сериалд тархиа угаалгаж,Хятад хүнсэнд ходоодоо даатгаж,хэрэглээний боол болсон ард түмнээ “сэхээрүүлэх“вэ!
Яаж би-Эмэгтэйчүүд нь нүүрээ гоодож, эрчүүд нь булчингаа хөгжүүлэхээс хэтрэхгүй ядуу сэтгэхүйгээс “ангижрах” вэ
Яаж би-Бөх,морь,дуу,хошин шог....бахархал нь ийм явцуухан мөртлөө Монгол гэж цээжээ дэлдэгсдэд хийх сурах зүйл дэлхийгээс ихийг “ухааруулах” вэ
Яаж би-Мэдлэгээр хаанчлах даяаршсан ертөнцөд мэлийж зүгээр сууна, өөдөө тэмүүлсэн нэгнээ татаж унаган өөртэйгөө адилхан болгочихоод “өрсөлдөх чадвар ярих ” вэ!!! Яаж би......
/Найзуудын хүсэлтээр /
Сэтгүүлч Б. ОТГОН 2017.11.17
