Гэр бүл, хүүхэд, залуучуудын хөгжлийн газрын албан хаагчид өнөөдөр охид, эмэгтэйчүүдийн хүчирхийллийн эсрэг дуу хоолойгоо нэгтгэн “Цагаан туузтан” аянд нэгдлээ. Энэ үеэр албан хаагчид охид эмэгтэйчүүдийн хүчирхийллийн талаархи мэдээлэл болон “Охин” баримтат кино болон Гэр бүлийн хүчирхийлэлтэй тэмцэх тухай хуулийн агуулгаар хийсэн гурван төрлийн богино хэмжээний дүрс бичлэгийг үзүүлсэн юм.
“Жендэрт суурилсан хүчирхийлэлтэй тэмцэх ОУ-ын 16 хоногийн аян”-ыг жил бүрийн 11 сарын 25 –аас 12-р сарын 10-ны өдрийг дуустал дэлхий даяар тэмдэглэн, хүчирхийллийн эсрэг олон нийтэд хандсан янз бүрийн арга хэмжээ явуулдаг уламжлалтай. 1991 оноос хойш энэхүү аянд 170 гаруй орон нэгдэж, охид эмэгтэйчүүдийн эсрэг хүчирхийллийг зогсоохыг шаардан, дэлхий нийтийн хөдөлгөөн өрнүүлж байна. Уг аяны хүрээнд тохиодог охид эмэгтэйчүүдийн эсрэг бүх төрлийн ялгаварлан гадуурхалт, хүчирхийллийг хүний эрхийн хүрээнд, цогцоор нь үзэх боломж бүрддэг.
“Жендэрт суурилсан хүчирхийлэлтэй тэмцэх ОУ-ын 16 хоногийн аян” нь хүчирхийллийг тэвчихгүй байхыг, нуугдмал, чимээгүй байдлыг халахын төлөө хүн бүр дуугарч эхлэхийг уриалах, охид эмэгтэйтэйчүүдийн эсрэг хүчирхийллийг таслан зогсоохын төлөө хүн бүр дор бүрнээ жаахан ч болтугай алхам хийх, санаачлагыг дэмжих, хүчээ нэгтгэх, хүн бүрийн аюулгүй байдлыг хангах, эрх, эрх чөлөөг хамгаалах үүрэг, амлалтаа биелүүлэх, хуулийн хэрэгжилтийг хангах зорилготой юм.