.JPG)
Өнөөдрөөс эхлэн Өмнөговь аймгийн нутаг дэвсгэр дээгүүр зөвхөн Өмнөговийн дугаартай л машин тэрэг нүүрс тээвэрлэх болжээ. Ийм шийдвэрийг Өмнөговь аймгийн ИТХ аль 2011 онд гаргаж, өнөөдрөөс мөрдөж эхлэх болсноо зарласныг Та бид харж байна. Нутаг нугаар нь ялгаварлах болсон шийдвэрээ "түгжрэлээс гарах арга зам, нутгийн иргэдээ дэмжих бодлого" гэж орон нутгийн удирдлага тайлбарлаж буй аж.
Өнөөдөртөө 10 мянган том оврын тээврийн машин Өмнөговьт нүүрс тээвэрлэж буйгаас 6000 орчим нь хятад эзэдтэй гэх мэдээлэл бий. Орон нутгийн ИТХ-ын тогтоол, Орон нутгийн Таван Толгой компанийн энэхүү шийдвэр нь хятад эзэнтэй, өмнөговийн дугаартай 6000 машинд үйлчлэх зориулалттай гэж иргэд шүүмжлэлтэй хандаж байна. Яагаад гэвэл, энэ машинууд бүгд орон нутгийн дугаартай.
Унаж сунатлаа дараалалд зогссон монголчууд дараагийн цохилтыг ийнхүү амсах нь энэ. Ажил хийх, амьдралаа залгуулах гэсэн Монголчуудаа ийнхүү хавчиж байна. Хятад улсын зүгээс хил гаалиа чангалснаас болж тээвэрчдийн эргэлт эрс цөөрч, сардаа 1 удаа хил давахдаа тулсан бол, одоо бүр тээвэрлэх эрхээ ч хаалгах нь. Орон нутгийн удирдлагын жалга довны үзэл баримталсан, нугалаа гаргасан энэхүү тогтоолыг цаг алдалгүй эргэн харах цаг болжээ.
Э.ОТГОНЖАРГАЛ
