Төрийн шагналт, АУЗ Б.Лхагвсүрэн ходоодны хорт хавдар гэсэн оноштой болсон тухай мэдээлэл саяхнаас олон нийтэд хүрсэн. Тэрээр 100 сая төгрөгөөр БНСУ-д ирэх 1-р сарын эхээр эмчилгээ хийлгэх тов гарсан юм. Харин түүний эмчилгээнд Засгийн газрын нөөц сангаас 10 сая, БСШУСЯ-аас 10 сая, ЭМЯ-аас 5 сая төгрөг гаргахаар шийдвэрлээд байгаа. Тэгвэл Өвөрмонголчууд хайрлаж_ хүндэлж явдаг зохиолчдоо зориулж хандив цуглуулах аян өрнүүлжээ. Долоо хоногийн аяны хүрээнд нийт 150520 юань буюу монгол мөнгөөр 55 сая төгрөг цугласан байна.
Тэд "Бавуугийн Лхагвасүрэн бол та бидний хайрлан хүндэтгэдэг монгол яруу найргийн ноён оргил билээ. Тэр удаан жилийн турш дундад, монгол хоёр улсын соёлын харилцааг халамжилж идэвхитэй оролцож ирсэн юм. Бүр манай улсад ч олонтаа ирж соёлын үйл ажиллагаанд идэвхитэй оролцож манай улсын уран бүтээлчидтэй хамтран ажиллаж манай уран бүтээлчдэд өөрийн эрдэм туршлагаа харамгүй зөвлөж ирсэн юм. Түүниa яруу найргийн ном нь дундад улсын үндэсний хэвлэлийн хороо /хятад хэлээр/ Өвөр монголын ард хэвлэлийн хороо, Соёлын хорооноос хэвлэгдэн тараагдаж манай улсын өргөн олон монголчуудын бахархал, таашаалыг ихэд олсон юм. Эдүгээ бидний хайрлан хүндэтгэдэг зохиолч маань ходооны хорт хавдар тусч бачим, түргэн мэс засал хийлгэх шаардлагатай боллоо. Иймд хандивын үйл ажиллагаа эхлүүлж байна" гэжээ.
Ийнхүү тэд сайхан сэтгэлийн үүднээс явуулсан хандивын үйл ажиллагаа амжилттай болжээ. Одоо эрхэм яруу найрагч хагалгааныхаа зардлын 80%-ийг олчихоод байна.
С.ШҮРЭНЧИМЭГ
