БСШУСЯ, НЗДТГ-тай хамтран ажиллах чиглэлээ тодорхойлж, цаашид хийж, хэрэгжүүлэх ажлын талаар санал солилцов. Уулзалтад УИХ, Засгийн газрын гишүүн, БСШУС-ын сайд Ц.Цогзолмаа, Нийслэлийн Засаг дарга бөгөөд Улаанбаатар хотын захирагч С.Батболд болон бусад холбогдох албаны хүмүүс байлцлаа. Нийслэл болон БСШУСЯ-ны удирдлагын түвшинд болсон уулзалтаар ирэх онд боловсрол, соёл, спортын салбарт хийгдэх бүтээн байгуулалтын ажлуудыг эрт эхлүүлэх, газар чөлөөлөлт болон зураг төсвийн асуудал дээр байр сууриа нэгтгэх талаар харилцан санал солилцсон юм.
БСШУСЯ-ны харилцагч байгууллагуудын 70 хувь нь нийслэлд байрлаж буй. Тиймээс ч ирэх онд сургууль, цэцэрлэгийн хүртээмжийн асуудлыг бүхэлд нь шийдвэрлэж, хөрөнгө оруулалт, бүтээн байгуулалтын жил байхаар төлөвлөж буйгаа уулзалтын эхэнд БСШУС-ын сайд Ц.Цогзолмаа онцлов. Тэрбээр цааш нь "Нэг сая гаруй хүн амтай, үзвэр, үйлчилгээ төвлөрсөн их хотдоо өнгө, үзэмж нэмэх сургууль, цэцэрлэгийн барилгыг ашиглалтад оруулах, гурван ээлжтэй сургуулийн асуудлыг нэн даруй шийдвэрлэх, Байгалийн түүхийн музейн газрын асуудлыг шийдвэрлэх, үзвэр, үйлчилгээний томоохон цогцолбортой болох зэрэг их ажил биднийг хүлээж байна" гэв.
Тиймээс ч хамтарсан ажлын хэсэг байгуулж, хөрөнгө оруулалт, бүтээн байгуулалт, удааширсан төсөл, хөтөлбөрийг эрчимжүүлэх зэрэг олон ажлыг хамтдаа урагшлуулах талаар тодорхой шийдэлд хүрлээ. Мөн шинээр баригдах сургууль, цэцэрлэг, бага сургуулийн барилгын газрыг чөлөөлөх, нийслэлийн ЕБС-ийн сурагчдыг нийтийн тээврийн хэрэгслээр үнэ, төлбөргүй зорчуулахад шаардагдах хөрөнгийг шийдвэрлэх зэрэг асуудлын талаар харилцан санал солилцсон юм.
Эх сурвалж : БСШУЯам
